Read O Debleskro Drom - I Bibla an o Romano Rakepen 2021 Hiob 8 Bible Online

Hiob 8 - O Debleskro Drom - I Bibla an o Romano Rakepen 2021 bible

Hiob 8

¹O Bildad dran o them Shuach penas koi pre:

²Har rah gomme kameh tu sau koowa win rakrell? Kowa, hoi rakreh hi har i sorelo phurdepen.

³Patseh tchatchepah, te krell o sorelo Dewel gar, hoi mishto un tchatcho hi? Patseh, te rissrell lo peskre tchatchepaskre laba trujel?

⁴Tire tchawe kran, hoi tchilatches his glan leskre jaka. Doleske das lo len pengri phagi.

⁵Te rodeh tu o Debles tiro tselo djijeha, un mangeh ropah o sorelo Deblestar, te well lo tuke pale latches,

⁶un djiweh i djudjo djipen an o tchatchepen, palle stell lo tuke pre, un mukell les tuke un tiri familjake pale mishto te djal, jaake har tchatcho hi.

⁷Kowa, hoi tut glan kowa his, well tuke tiknes glan, te dikeh ko baro brawlepen, hoi dell tut o Dewel an ko tsiro, hoi wella.

⁸Dik ap kowa, hoi djinan i menshe an o phuro tsiro! De jak ap kowa, hoi hatsan mare phure win!

⁹Hi jaake har te wams boldo taissar. Mer djinah tchi. Maro tsiro, kai ham ap kai phub, hi tikno har i suni.

¹⁰Tire phure nai sikrenn tut, hoi le win hatsan, un hoi jon an pengro djipen dikan:

¹¹I shilftikro khass nai well kokres kote baro, kai sapeno hi. Panjeskro senlepen nai djal gar kote pre, kai kek pani hi.

¹²Te hi lo gomme senelo un gar bares doha, te well lo tele tchinlo, marell lo sikeder tele har ko wawar senlepen, te hi les kek pani.

¹³Jaake djal hakeneske, kai o Debles bistrella. Kowa, kai gar o Debleha djiwell, koleske atchell tchi, hoi dell les pale newi soor.

¹⁴Kowa, hoi kamell lo te well, kowa well gar. Ap koleste job pes rikrell, kowa hi jaake har i sano thab, hoi i spinna tserdell.

¹⁵Rikrell lo pes ap peskro kheer, phagell kowa khetne. Rikrell lo pes ap kowa, hoi les hi, atchell kowa gar.

¹⁶I mensho kek Debleha hi har senlepen, koles doha pani hi, glan te djal o kham pre, un hoi buchles well, un djal pral i tseli baar.

¹⁷Leskre draba tserdenn pen pral barra, un rikrenn pen soreles ap lende.

¹⁸Te tserdell jek les win, djinell buder kek, kai lo tardo his.

¹⁹Kaja hi leskri tseli bacht an peskro djipen. Un ap leskri platsa djan pale wawar pre.

²⁰Penau tuke, o Dewel witsrell kolen gar pestar, kai an o tchatchepen djiwenn. Un job rikrell gar i tchilatchen pash o wast.

²¹Job krell, te nai saneh pale, un deh gole i bachtjatar.

²²Kolla, kai kamenn tuke tchilatchepen te krell, hunte ladjenn. Un i khera i tchilatchendar atchenn gar tardo.