Read O Debleskro Drom - I Bibla an o Romano Rakepen 2021 Hiob 9 Bible Online

Hiob 9 - O Debleskro Drom - I Bibla an o Romano Rakepen 2021 bible

Hiob 9

¹O Hiob penas koi pre:

²Tchatchepah, djinau te hi jaake. Har nai well i mensho an o tchatchepen glan o Debleste?

³Te kamell lo pes leha te tchingrell, nai putchals lestar o Dewel jek sero koowa. Un o mensho nai penals gar jek pale.

⁴O Dewel hi gosewo an peskro dji un les hi bari soor. Kekeske, kai las pes glan te tchingrell lo leha, djas kowa mishto.

⁵O Dewel tchiwell i berge jek rigjatar ap i wawar, glan te haiwenn le kowa. An peskri choli witsrell lo len trujel.

⁶Job taprell ap i phub un koja trissell, Ninna i barra, hoi hidjrenn lat, trissenn.

⁷Rakrell lo soreles ap o kham, djal o kham gar pre. Un i bolepangre momelentsa krell lo, te wenn le gar diklo.

⁸Job kokres kras o bolepen buchles pral i phub, un djal pral o baro pani.

⁹Job kras kol bolepangre momlia, hoi kharenna: Baro Wurdin, Orion, Efta Momelengre, ninna kol bolepangre ap koi rig, kai o kham pralstunes tardo hi.

¹⁰Job krell sawo baro un sorelo koowa, te nai haiwah les gar, sawo bud baro koowa, hoi kek wawar nai krell, te nai djinah gar, har bud kowa hi.

¹¹Job djal glan mande dureder, un me dikom les gar. Job djal glan mande dureder, un me haiwom gar, te his lo koi.

¹²Te lell lo jekes sorjah krik, koon kamell les pre te rikrell? Kek nai penell ap leste: Hoi kreh tu?

¹³O Dewel rikrell peskri choli gar pale, un was sorleder har kolla, kai wan o baro panjeskro sapeske Rahab ap i rig.

¹⁴Har nai hatsoms me laba, te nai penap tchomone ap leste?

¹⁵Ninna te wals man tchatches, nai rakroms tchi ap leste, hoi job mandar putchas. Me nai mangoms kokres latchepen lestar, kai miro tchatchepaskro rai hi.

¹⁶Ninna te mukals lo man leha te rakrell, patsau me gar, te shunals lo ap miro rakepen.

¹⁷Job bitchrell i sorelo phurdepen, te taprell lo pal mande, un dell man bud dukepen, ninna te krom tchi.

¹⁸Job mukell man gar jek kopo ducho te lell, na-a, job krell man pherdo ropen un duk.

¹⁹Te djoms ap leste sorjah, job hi o sorleder! Te kamoms les glan i tchatchepangre te anell, penals lo: Kones kameh te bitchrell, te anell lo man koi?

²⁰Ninna te waus an o tchatchepen, miro rakepen anals i phagi pral mande. Ninna te wals kek doosh ap mande, dals lo man i doosh.

²¹Kek tchilatchepen krom me. Miro djipen hi mange buder tchi moldo. Kamau buder gar te djiwell. Lauter hi mange jek. Doleske penau me: O Dewel dell koles mulo, kai latcho un tchatcho hi, un ninna koles, kai tchilatcho hi.

²³Te well i bari bibacht, un marell menshen ap jek kopo, palle sal lo pral kowa, ninna te hi kek doosh ap lende.

²⁴Job das i phub an o wast i tchilatchendar. Un kolla, kai o tchatchepen win krenn, kolen kras lo korelo, te dikenn le tchi. Te his job kowa gar, koon wawar his kowa?

²⁵Miro djipen nashell sikeder krik har i naashepaskro. Hako diwes djal trujel un anas mange kek bacht.

²⁶Miro djipen nashell jaake sik dureder har i sik bero[9] un har i baro tchirklo, hoi mukell pes tele te perell ap i tikno viecho, te taprell lo les.

²⁷Te penau mange: Kamau te bistrap miri tseli duk, un kamau te krap i wawar mui, un pale te sanap,

²⁸palle taprau pale daar i tsele dukendar. Un djinau, glan o Debleskre jaka hi man doosh.

²⁹Job kamell i doosh ap mande te dikell. Hoske marap man palle tchitcheske tele?

³⁰Ninna te thowoms man gibeha tele, un mire wasta sapuneha,

³¹witsrals lo man an i tchikli cheb, te wans mire ripja djungeles glan mande.

³²O Dewel hi kek mensho har me hom, te nai penoms leske i lab pale, te nai djams khetne pash jekeste, koon nai krals o tchatchepen mashkral mende win.

³³Kamoms te dals i tchatchepaskro mursh mashkral mende, koon o pralstuno pral mende dujende hi,

³⁴te lell kowa o kasht krik, koleha o Dewel man dell, un man buder gar daar wals!

³⁵Palle nai rakroms un man wals kek daar lestar. Jaake har kanna pash mande hi, nai krau kowa gar.