Read O Debleskro Drom - I Bibla an o Romano Rakepen 2021 Debleskri gili 103 Bible Online

Debleskri gili 103 - O Debleskro Drom - I Bibla an o Romano Rakepen 2021 bible

Debleskri gili 103

¹O Davidestar. Miro tselo djijestar sharau o baro Debles. Lauter, hoi an mande hi, sharell leskro Debleskro lab!

²Miro tselo djijestar sharau o baro Debles, un bistrau gar o latchepen, hoi job mange kras.

³Job hi kowa, kai miri tseli doosh mandar krik lella, kowa, kai miro tselo nasslepen krik lella un man sastes krella,

⁴kowa, kai man dran o merepen win lella, kowa, kai peskro latchepen un kamlepen pral mande win tchorella,

⁵kowa, kai man tchales krella peskro latchepah, un man pale terno krella, un sorelo har i adlari.

⁶O baro Dewel tchiwell o tchatchepen pre, un dell kolende pengro tchatchepen, kai wenn tele rikedo.

⁷Job mukas o Moses te djinell, hoi job krella, un kras glan i Israelende baro koowa, kai kek wawar nai krella.

⁸O baro Dewel hi i latcho Dewel, kai krell peskro dji pre peskre menshenge. Job well gar sik chojedo. Un leskro latchepen herell gar pre.

⁹Job tchingrell gar hako tsireske, un atchell gar hako tsireske chojedo.

¹⁰Job dell men gar i phagi pal kowa, hoi kram, un dell men maro tchilatchepen gar pale.

¹¹Jaake dur har o bolepen pral i phub hi, jaake baro hi leskro latchepen kolenge, kai djiwenn leha.

¹²Koi rig, kai o kham pre djal, hi dur krik kolatar, kai lo tele djal. Jaake dur har kai jek rig hi koi wawaratar, jaake dur tchiwas job mari doosh mendar krik.

¹³Jaake har i dad peskro dji pre krell peskre tchawenge, jaake krell o baro Dewel peskro dji pre kolenge, kai djiwenn leha.

¹⁴Job djinell, kai menshe ham; te ham dran tchik kerdo, bistrell lo gar.

¹⁵I mensho hi har khass, har senlepen, hoi pre-djas.

¹⁶Palle phurdell i ducho pral wergel, un krik hi lo, un koi platsa, kai lo his, prindjrell les buder gar.

¹⁷O latchepen o baro Deblestar hi gar jaake. Kowa atchella hako tsireske. An kek tsiro lell lo les krik kolendar, kai djiwenn leha. Ninna lengre tchawenge un kolengre tchawenge rikrell job peskro lab,

¹⁸kolenge, kai bistrenn gar, hoi job lengre phurentsa win kras, un rikrenn pen ap leskre laba.

¹⁹O baro Dewel tchiwas peskri raili beshepaskri an o bolepen. Un job hi o rai pral halauter.

²⁰Sharenn o baro Debles, tumer bolepangre, kai han leskre sorele kurepangre, un krenn, hoi job penell, un shunenn ap leskre laba!

²¹Sharenn o baro Debles, tumer leskre bolepangre lurde, kai budrenn leske un krenn, hoi job kamell!

²²Sharenn o baro Debles, tumer lauter, kai wan lestar kerdo! Sharenn les, kai tumer ninna djiwenna an leskro them! Ninna tu, miro dji, share o baro Debles!