Read O Debleskro Drom - I Bibla an o Romano Rakepen 2021 Debleskri gili 104 Bible Online

Debleskri gili 104 - O Debleskro Drom - I Bibla an o Romano Rakepen 2021 bible

Debleskri gili 104

¹Miro tselo djijestar sharau o baro Debles. Miro baro Dewel, har baro hal tu! An shukapen un railepen hal tu rido.

²Har i baja tchiwal i bari momeli trul tute. Tu tserdal o bolepen buchlo har i bari plachta,

³un kral tuke i kheer pral i panja. Tu ulereh ap i wolke har ap i wurdin, un i winta hidjreh tut.

⁴O ducho, hoi phurdell tel o bolepen, hi tiro bitchepaskro. Un i jag hi tiro budepaskro.

⁵Tu tchiwal i phub soreles tardo, te atchell li tardo hako tsireske.

⁶I panja tchakran lat har i ripen, un o pani his pral haki berga tardo.

⁷Har tchingral ap leste, djas o pani pale, glan tiri gole nashas lo peske,

⁸un nashas i berge pral tele an i tala, jaake dur har tu penal.

⁹Tu penal, har dur i panja nai djan, un dureder nai djan le gar. I duito kopo hunte djal o pani gar pral i tseli phub.

¹⁰An o telstuno them mukeh tu tikne panja dran i phub te well, te nashenn le mank i berge.

¹¹Jaake well i wesheskre viechen te pijell, un i diwje burike[63] nai pijenn, bis te hi len buder kek trush.

¹²Pral lende an i ruka hi i tchirkle beshdo un giwenna.

¹³Dran o bolepen deh tu brishin ap i berge, un kreh te well i phubjat doha pani.

¹⁴Tu mukeh i viechenge o khass bares te well, un djob un senlepen i menshenge. Jaake anell lenge i phub lengro chapen win:

¹⁵i mool, hoi o mensheskro dji bachteles krella, o djet, hoi leskro mui shukar krella, un o maro, hoi o menshes soreles krella.

¹⁶Ninna i bare ruka lenn doha pani, kol zedertikre ruka ap i berga Libanon, hoi tu, baro Dewel, kote an i phub tchiwal.

¹⁷An kol ruka krenn i tikne tchirkle pengre khera, un i storche beshenn pral ap i ruka.

¹⁸An i bare berge djiwenn i diwje busja. Un mank i barra hi i bergetikre shoshoja[64] khere.

¹⁹Tu kral o moonto, te sikrell lo men i deesh-te-dui tchonna an o bersh. O kham djinell peskro tsiro, har lo tele djala.

²⁰Tu peneh, te well rati, un koi wenn i tsele weshengre vieche win.

²¹Kol terne diwje margodje denn gole pal mass, un mangenn o Deblestar pengro chapen.

²²Te djal o kham pre, tserdenn le pen pale, un tchiwenn pen tele an pengro khatepen.

²³Palle djan i menshe win ap pengri budi un budrenna bis ap i rat.

²⁴Baro Dewel, har baro un bud hi kowa, hoi tu halauter kral! Har gosewes kral tu halauter! I phub hi pherdo o tselo koowa, hoi tu kral.

²⁵Kote hi o baro pani, baro un buchlo. Un vieche hi dren: bare un tikne, jaake bud, te nai djinell kek har bud.

²⁶I shiffe ulerenn pengro drom; un koi hi o baro panjeskro viecho, o Leviatan, hoi tuke kral, te kheless tu leha.

²⁷Kolla lauter denn jak, kaana tu weh, te dess len te chal ap o tchatcho tsiro.

²⁸Tu deh len, un jon lenn les. Tu kreh tiro wast pre, un jon lauter wenn tchalo.

²⁹Tu te djah lendar krik, taprell len i daar. Tu te leh lendar o ducho, merenn le, un wenn pale tchik.

³⁰Tu te bitchreh tiro djipaskro ducho, wenn le kerdo, un tu deh newo djipen ap i phub.

³¹O Debleskro railepen mu atchella hako tsiro! Mu well lo bachtelo pral kowa, hoi job kras!

³²Job dikell i phub an, un joi trissella. Job taprell i berge an, un i jagakri tampa djal pre dran lende.

³³Kamau te giwell o baro Debleske, jaake rah har djiwau, kamau te bashrell miro Debleske, jaake rah me hom.

³⁴Mu well miri gili leske shukar! Me hom bachtelo pral miro baro Debleste.

³⁵Mu atchenn kolla gar djido ap i phub, kai o Debleskro drom mukan. Mu well ko tsiro, kai hi buder kek tchilatche koi! Miro tselo djijestar sharau o baro Debles. Sharedo well o baro Dewel!