Read O Debleskro Drom - I Bibla an o Romano Rakepen 2021 Debleskri gili 105 Bible Online

Debleskri gili 105 - O Debleskro Drom - I Bibla an o Romano Rakepen 2021 bible

Debleskri gili 105

¹Parkrenn tumen pash o baro Debleste, un hadenn leskro lab! Penenn i menshenge an i wawar themma kowa, hoi job kras!

²Giwenn un bashrenn leske! Rakrenn pral ko tselo baro koowa, hoi job lauter kras!

³Sharenn koles, koon kokres o tchatcho Dewel hi! Awenn bachteles pral leste, tumer, kai rodenn o baro Debles!

⁴Putchenn pal o baro Debleste, un pal leskri soor! Awenn glan leste hako tsiro!

⁵Tumer, kai wenn pal o Abraham, o Debleskro budepaskro, tumer tchawe o Jakobestar, koles job win rodas, ma bistrenn, hoi job lauter kras an peskri bari soor, kowa, hoi kek wawar nai kras! Ma bistrenn, har job o tchatchepen pral i menshende win rakras!

⁷O baro Dewel hi maro Dewel, un o tchatchepaskro rai pral i tseli phub.

⁸An kek tsiro bistrell lo peskri sowel, hoi lo mentsa dren djas. Peskro lab, hoi das lo, atchella jaake rah har menshe ap i phub djiwenna.

⁹Kowa hi ko lab, hoi das lo o Abrahameste, koi sowel, hoi das lo o Isaakeste,

¹⁰un pal leste o Jakobeste, un das peskro wast pre, te atchell kau lab i Israelenge hako tsireske.

¹¹Job penas: “Tuke dau kau them Kanaan, kowa hi ko them, hoi tumenge well.”

¹²An ko tsiro his le gar bud, gar budeder har i wast pherdo, un his wi-themarja an o them.

¹³Un jon djan jek themestar an o wawar, djan trujel an bud rajengre themma.

¹⁴Un o Dewel das jak, te taprell len kek an. Un i bare rajen pral kol themma das lo trad un penas lenge:

¹⁵“Lenn i wasta krik mire menshenge, kolen mange win rodom! Ma krenn tchilatchepen kolenge, kai mire rakepangre[65] hi!”

¹⁶Un job mukas i bari bok an o them te well, te das buder kek maro.

¹⁷[Un jon djan an o them Egiptia.] Glan lende bitchras lo i murshes. Kowa his o Josef. Job was i ginlo budepaskro.

¹⁸Leskre herja pandan le an sasterne shelle, un trul leskri meen tchiwan le saster,

¹⁹bis te was ko tsiro, kai ko lab tchatcho was, hoi o Josef o baro Deblestar las un glan-wi penas.

²⁰Un o baro rai bitchras jekes koi, te mukell lo les win dran o stilepen. Un o baro rai pral menshende an bud themma mukas les win.

²¹Un kras, te was o Josef o pralstuno pral leskro kheer, un tchiwas lauter, hoi les his, an leskre wasta.

²²Job te sikrell o baro rajeskre budepangre, hoi te krenn le. Kol pralstunende pral o them sikras lo, har te krenn le o feteder o themeske.

²³Palle was o Jakob an o them Egiptia, un o Israel[66] his i wi-themari an o them o Hameskre tchawendar[67].

²⁴O baro Dewel mukas peskre menshen bud un budeder te well. Jaake wan le bareder un sorleder har kolla, kai len tikno rikrenn.

²⁵Kolenge das lo an o dji, te dikenn le tchilatche jakentsa ap o Debleskre menshende, un kran lenge midjak koowa.

²⁶Job bitchras peskro budepaskres, o Moses, un o Arones, koles job peske wi-rodas.

²⁷Un jon kran baro koowa an o Debleskri soor mank i Egiptarja, sawo koowa, hoi kek wawar nai kras an o them o Hameskre tchawendar.

²⁸O baro Dewel bitchras i tamlepen[68], te was kales, har rati. I Egiptarja shunan gar ap leskre laba.

²⁹Job kras rat dran i tsele panja i Egiptarendar, un mukas i matche kote dren te merell.

³⁰Job kras o tselo them pherde djambe, ninna kote, kai i bare raja sowenna, his le.

³¹Job penas, te wenn matsille, hoi tchurje denn, un bud matsille wan an o tselo them.

³²Har dikan i Egiptarja ap brishin, bitchras lo lenge barrengro brishin an lengro them, ninna jag, hoi pral un tele djas ap o bolepen.

³³Lengre drakengre ruka un faigetikre ruka das lo tele, un phagas i tsele ruka an lengro them.

³⁴Job penas, te wenn stepangre[69], un stepangre wan, jaake bud, te nai penas kek, kitse jon hi.

³⁵Un kolla chan lauter pre, hoi baro was an lengro them, ninna o djob ap i hachetikri phub.

³⁶Job das o phureder mursh tchawes mulo haki datar an o them Egiptia. Kolla his lengre dadengri feteder soor.

³⁷Har anas o baro Dewel i Israelitarjen win, lan le rup un sonakai pentsa. Un kek lendar his nasselo un hunte atchas pale.

³⁸I Egiptarja daran lendar, un his bachtele, har djan jon penge.

³⁹O baro Dewel khatras peskre menshen tel i wolka, un rati sikras len i jag o drom.

⁴⁰Jon mangan lestar mass, un job mukas pesse tchirkle te well. O mareha dran o bolepen kras lo len tchalo.

⁴¹Job phagas i baro bar, un pani nashas win, un nashas an o mulo them har i lengsto baro pani.

⁴²Job bistras gar peskro Debleskro lab, hoi das lo peskro budepaskres, o Abraham.

⁴³Har anas lo peskre wi-rodede menshen win, sanas lengro dji. Un jon giwan i bachtjatar.

⁴⁴Job das len o them wawar menshendar, un halauter, hoi kolen his, das lo lende, te well kowa lengro.

⁴⁵Kawa kras lo, te rikrenn le leskre laba, un shunenn ap kowa, hoi job lenge penas. Sharedo well o baro Dewel!