Read O Debleskro Drom - I Bibla an o Romano Rakepen 2021 Debleskri gili 107 Bible Online

Debleskri gili 107 - O Debleskro Drom - I Bibla an o Romano Rakepen 2021 bible

Debleskri gili 107

¹Sharenn o baro Debles. Job hi latcho. Leskro latchepen atchell hako tsireske.

²Kowa te penenn i wi-line menshe, kolen o baro Dewel win las dran i wasta kolendar, kai len pandan.

³Job anas len khetne dran bud themma, kotar, kai o kham pre-djala, kotar, kai o kham tele djal, kotar, kai o kham gar well, un kotar, kai o kham pralstunes tardo hi.

⁴Mank lende his sawe menshe, kai his nashedo an o mulo tato them. Kek drom hatsan le, witar kek foro, kai menshe djiwenna.

⁵Jon bokan un trushan, un patsan buder gar, te wenn le win.

⁶Har lenge jaake djungeles djas, dan le gole ap o baro Debleste. Un job las len win dran lengri daar.

⁷Un job sikras len o tchatcho drom, jaake te wan le an i foro, kai menshe djiwenna.

⁸Jon hunte parkrenn pen pash o baro Debleste, te was lo jaake latches ap lende, un kras baro shukar koowa ap i menshende.

⁹Kolen, kai his len trush, das lo doha te pijell, un kolen, kai his len bok, das lo bud latcho chapen.

¹⁰Wawar his beshdo an o stilepen, kai his kek momeli, kokres kali rat. Lengre wasta un herja his pandle an saster un dukran len.

¹¹Jon shunan gar ap o Debleste, kai hi o Dewel pral halauter, un tchiwan leskre laba ap i rig.

¹²Doleske mukas lo len khetne te phagell. Jon his koi tchiddo, un kek his koi, kai hidjrals len pre.

¹³Har lenge jaake djungeles djas, dan le gole ap o baro Debleste. Un job las len win dran lengri daar,

¹⁴un anas len win dran i kali rat, kai kek momeli his, un kras lengre sasterne shelle pre.

¹⁵Jon hunte parkrenn pen pash o baro Debleste, te was lo jaake latches ap lende, un kras baro shukar koowa ap i menshende,

¹⁶te das lo sasterne wudja dren, un phagas sasterne pandepangre[70].

¹⁷Wawar kran dinelo koowa, peran o Debleskro drom tele, un anan doosh ap pende. Doleske djas lenge jaake djungeles,

¹⁸te nai chan le buder tchi, un his budeder mulo har djido.

¹⁹Har lenge jaake djungeles djas, dan le gole ap o baro Debleste. Un job las len win dran lengri daar,

²⁰un rakras i lab, un jon was sasto. Un job las len win dran o merepen.

²¹Jon hunte parkrenn pen pash o baro Debleste, te was lo jaake latches ap lende, un kras baro shukar koowa ap i menshende.

²²Ninna hunte anenn le leske shukar koowa, te parkrenn le pen pash leste. Un i bachtelo djijeha hunte rakrenn le kolestar, hoi job lenge kras.

²³Wawar uleran ap i shiffe win ap o baro pani, te bikrenn un parenn le.

²⁴Kolla dikan, hoi o baro Dewel nai krell, un hawi soor les pral o baro pani hi.

²⁵Job rakras, un i sorelo ducho phurdas, hoi o pani pral un tele das.

²⁶Un o shiffo was pre hidjedo an o bolepen, un peras pale tele an o telstunepen. Un i mursha an o shiffo dan gole i darjatar,

²⁷un nai rikran pen gar ap i herja, har te wans le mate, un djinan buder gar, hoi te krenn le.

²⁸Har lenge jaake phares his, dan le gole ap o baro Debleste, un job las len win dran pengri daar,

²⁹un kras, te phurdas o sorelo ducho buder gar. Un o pani tchiwas pes pale.

³⁰Un jon wan bachtelo, te tchiwas pes lauter. Un job anas len pash o them, kai jon nai atchan.

³¹Jon hunte parkrenn pen pash o baro Debleste, te was lo jaake latches ap lende, un kras baro shukar koowa ap i menshende.

³²Jon hunte sharenn les kote, kai jon khetne wenna, un hadenn les kote, kai i phureder khetne wenna.

³³Dran o them, kai pani nashell, kras lo i mulo them, un mukas kol lengste panja buder gar te nashell.

³⁴Jaake was i phub, kai bud djob un senlepen baro was, i mulo londo them. Kowa kras lo dran o tchilatchepen kol menshendar, kai kote djiwenn.

³⁵Un pale mukas lo an o mulo them bud pani te nashell, un dran i truk phub pani te well.

³⁶Un mukas kolen, kai bokenn, kote te djiwell, un kolla kran penge kote i foro,

³⁷un tchiwan djob an i phub, ninna drakengre ruka, un anan bud chapen dren.

³⁸Un job das len bacht, un jon wan bud un budeder. Un job das len ninna bud viechen.

³⁹Pale wan le tikno rikedo, un i bibacht his soreles ap lende. Un jon wan tikno un tikneder.

⁴⁰Koi mukas lo ladj ap lengre raja te perell, un jon hunte nashan an o mulo them trujel, kote kai kek drom hi.

⁴¹I tchorwelen las lo win dran lengri bibacht, un kras, te wan jon pale bud, jaake har bakre, hoi wenn bud un budeder.

⁴²Kowa dikenn kolla, kai o tchatcho drom djan, un hi bachteles, un i tchilatchenge well o mui pandlo.

⁴³Koon gosewo hi, bistrell kowa gar, un haiwell, har latcho o baro Dewel hi.