Read O Debleskro Drom - I Bibla an o Romano Rakepen 2021 Debleskri gili 116 Bible Online

Debleskri gili 116 - O Debleskro Drom - I Bibla an o Romano Rakepen 2021 bible

Debleskri gili 116

¹Me kamau o baro Debles o djijestar, job shunas man, har rowom me ap leste.

²Leskro kand hi mange pre. Doleske rakrau leha jaake rah har djiwau.

³O merepen pandas man an peskre shelle. Djinom buder gar dren un win, jaake baro his miri daar te hunte meroms un djoms pash i mulende.

⁴Kote dom gole ap o baro Debleste: “Me mangau tut, baro Dewel, le miro djipen win dran o merepen!”

⁵O baro Dewel hi latcho un tchatcho, un o djijestar kamlo hi maro Dewel.

⁶O baro Dewel dell jak ap kolende, kai nai denn gar kokres ap pende jak. Har his man kek soor, was lo mange ap i rig.

⁷Me penau ap miro dji: “Ma dare buder! O baro Dewel his latcho ap tute.”

⁸Tu lal man win dran o merepen. Mire swa khossal tu, un ap mire herja dal jak, te perap gar.

⁹Jaake djiwau glan tute kate ap kai phub, kai i menshe djide hi.

¹⁰Me patsom o Debles, ninna te penom: “Man hi kek soor buder.”

¹¹Homs jaake phagedo, te penom: “I tsele menshe hi chochene.”

¹²Har nai krau me kowa pale mishto miro baro Debleske, hoi job lauter mange kras?

¹³Me anau les i khoro mool, te parkrap man pash leste, kai las lo man win dran o merepen.

¹⁴Glan peskre tsele menshende anau o baro Debleske kowa, hoi dom man sowel glan leste.

¹⁵O baro Dewel dikell i dukentsa ap o merepen peskre menshendar.

¹⁶Ach, baro Dewel, me hom jek kolendar, kai tuke budrenn. Awa, tiro budepaskro hom un budrau tuke har miri dai kras. Tu kral i shelle pre, hoi pandan man.

¹⁷Pash tute kamau me man te parkrell, un tut an-mangell.

¹⁸Glan tire tsele menshende anau tuke, hoi dom man sowel glan tute,

¹⁹un dau les tute kote ap i platsa glan tiro kheer an o foro Jerusalem. Sharedo well o baro Dewel!