Read O Debleskro Drom - I Bibla an o Romano Rakepen 2021 Debleskri gili 118 Bible Online

Debleskri gili 118 - O Debleskro Drom - I Bibla an o Romano Rakepen 2021 bible

Debleskri gili 118

¹Parkrenn tumen pash o baro Debleste! Job hi kamlo, un leskro latchepen atchella hako tsireske.

²Jaake hunte penenn i Israelitarja: Leskro latchepen atchella hako tsireske.

³Jaake hunte penell o Aroneskro kheer: Leskro latchepen atchella hako tsireske.

⁴Jaake hunte penenn kolla, kai djiwenn o baro Debleha: Leskro latchepen atchella hako tsireske.

⁵Har tapras man i daar, dom me gole ap o baro Debleste, un job shunas man, un kras miro dji soreles.

⁶O baro Dewel hi pash mande. Me darau gar. Hoi nai krell man i mensho?

⁷O baro Dewel hi pash mande, te well lo ap miri rig tardo. Jaake dikau mire jakentsa, har tchiwell lo kolen tel mande, kai kamenn mange tchilatchepen.

⁸Hi feteder te rikras men ap o baro Debleste, har te rikras men ap i menshende.

⁹Hi feteder te rikras men ap o baro Debleste, har te rikras men ap i rajende.

¹⁰Bud menshe his trul mande, kai kaman mange tchilatchepen. An i soor o baro Deblestar nai tradom len pale.

¹¹Haki rigjatar wan le ap mande pre. An i soor o baro Deblestar nai tradom len pale.

¹²Jon peran ap mande pre har i biene. An i soor o baro Deblestar nai tradom len pale. Har i jag sik win djal, hoi an i subjengre burra chatchell, jaake sik his le krik.

¹³Har dan le man i soreli dap, te perap, was o baro Dewel ap miri rig.

¹⁴Lestar well miri soor. Leske giwau miri gili. Job was un las man win dran i tchilatche wasta.

¹⁵Shun koi gili, hoi giwenn o Debleskre menshe bachteles an pengre khera: “O baro Dewel hi o sorleder. Job hi o sorleder an o kurepen.

¹⁶Leskro tchatcho wast hi hadedo: Job hi o sorleder an o kurepen.”

¹⁷Me merau gar. Na-a, atchau djido, un penau i menshenge, hoi o baro Dewel lauter kras.

¹⁸Ninna te das lo man soreles, mukas lo man gar te merell.

¹⁹Krenn mange i bare wudja pre an o Debleskro kheer, te djap dren, te parkrap man pash miro baro Debleste.

²⁰Kate hi o baro Debleskro wudar: i Debleskre menshe djana kote dren.

²¹Me parkrau man pash tute, te shunal tu man, un wal ap miri rig.

²²Ko bar, hoi i budepangre ap i rig witsran, kowa was ko sorelo bar, ap koleste o kheer tardo hi.

²³O baro Dewel kras kowa. Un kowa hi menge i baro koowa, hoi haiwah gar.

²⁴Kawa hi o diwes, hoi o baro Dewel kras. Giwenn un khelenn i bachtjatar pral leste!

²⁵Baro Dewel, ab ap mari rig! De men bacht, te djal lauter mishto!

²⁶Sharedo well kowa, kai well an o baro Debleskro lab. Kate, dran o Debleskro kheer rakrah o Debleskri bacht pral tumende win.

²⁷O baro Dewel hi kokres o Dewel. Kamles dikell lo ap mende. Awenn, lenn palmtikre patria an o wast, un djan khelepah glan o Debleskri chatchepaskri[73]!

²⁸Tu hal miro Dewel. Pash tute kamau man te parkrell. Miro Dewel, tut kamau me te sharell.

²⁹Parkrenn tumen pash o baro Debleste! Job hi kamlo, un leskro latchepen atchella hako tsireske.