Read O Debleskro Drom - I Bibla an o Romano Rakepen 2021 Debleskri gili 119 Bible Online

Debleskri gili 119 - O Debleskro Drom - I Bibla an o Romano Rakepen 2021 bible

Debleskri gili 119

¹Har bachtelo hi kolla, kai jaake djiwenna, te hunte tchingrell o Dewel gar lentsa, kolla, kai ap o baro Debleskro drom djana.

²Har bachtelo hi kolla, kai jaake djiwenn, har job lenge sikras, un pengro tselo djijestar ap leste shunenn.

³Kolla krenn kek tchilatchepen un djan ap o Debleskre dromma.

⁴Tu, baro Dewel, penal menge, hoi te kras mer, te rikras mer kowa hako tsiro.

⁵An miro tselo djipen kamoms te krap, hoi mandar kameh.

⁶Te dau jak ap tire laba, krau tchi te hunte ladjap man.

⁷Me parkrau man pash tute o tselo djijestar, te sikreh tu mange tire tchatchepaskre laba.

⁸Me kamau te krap, hoi mandar kameh. Ma muk man kokres!

⁹Har nai djal i terno mursh peskro drom jaake, te atchell peskro djipen djudjo? Kowa nai krell lo, te rikrell lo pes ap tiro lab.

¹⁰Miro tselo djijeha rodau tut. Ma muk man te mukap tire laba.

¹¹Me rikrau tiro lab an miro dji, te anap kek doosh ap mande.

¹²Sharedo wess tu, mo baro Dewel! Tu sikral mange, hoi mandar kameh.

¹³Me penau i wawarenge, har tu o tchatchepen wi-rakral.

¹⁴Me hom jaake bachtelo pral tiro drom, kai tu mange sikral, har te djiwap. Kowa hi mange shukeder har i baro brawlepen.

¹⁵Me rakrau kolestar, hoi tu menge penal, te kras kowa, un dau jak, te atchap ap tiro drom.

¹⁶Mange hi shukar, te krap, hoi tu mandar kameh, un bistrau tire laba gar.

¹⁷Ab latches ap mande, tiro budepaskro, te djiwap un rikrap tiro lab.

¹⁸Kre mange i jaka pre, te nai dikap har shukar hi te djap tiro drom.

¹⁹Me hom gar khere ap kai phub. Muk man te haiwap tire laba!

²⁰Miro dji chatchrell, te dikap har tu rakreh o tchatchepen win.

²¹Tu tchingreh pral kolende, kai phurdenn pen pre. Praassedo hi kolla, kai mukan tire laba.

²²Muk kek ladj ap mande te well! Muk len gar pral mande te sal! Me djau miro drom jaake har tu mange sikral.

²³I raja hi khetne beshdo, un rakrenna, har te krenn le mange tchilatchepen. Me hom tiro budepaskro un bistrau gar, hoi tu mandar kameh.

²⁴Tire laba, hoi sikrenn mange, har te djiwap, krenn man bachtelo. Jon hi mange har i latcho maal, ap koleste me shunau.

²⁵An i tchik hom witsedo. De man pale newi soor jaake har tu mange penal!

²⁶Me penom tuke lauter dran miro djipen, un tu shunal man. Sike mande, hoi mandar kameh!

²⁷Muk man te haiwap, hoi tire laba mange kamenn te penell. Jaake te rakrap pral ko baro sorelo koowa, hoi tu kral.

²⁸Miro dji rowell jaake te hi man buder kek soor. De man pale newi soor, jaake har penal.

²⁹Rike man pale i chocheno dromestar! An tiro latchepen sike man, har te djap ap tiro drom.

³⁰Me kamau tiro drom an o tchatchepen te djal, un jaake djiwell har tire tchatchepaskre laba menge penenn.

³¹Me rikrau man soreles ap tire laba, hoi mange sikrenn, har te djiwap. Baro Dewel, ma muk i wawaren pral mande te sal!

³²Miro dji hi dur pre, te krap lauter jaake har tu mandar kameh.

³³Sike tu man, baro Dewel, har te krap kowa lauter jaake, har tu mandar kameh, te djiwap miro tselo djipen jaake, har tu kameh.

³⁴Muk man lauter haiwell, te dap jak ap tiro drom, un shunap ap tute o tselo djijestar.

³⁵Ab mange ap i rig, te rikrap tire laba! Shukar hi le mange.

³⁶Kre te dikap ap tire laba, hoi mange sikrenn, har te djiwap, un dikap gar ap o brawlepen!

³⁷Kre, te dikap gar ap kowa, hoi tchi moldo hi, un de man pale newi soor ap tiro drom!

³⁸Me hom tiro budepaskro. Rike mange tiro lab, ko lab, hoi tu lauterenge dal, kai mukenn tut pengro rai te well.

³⁹Le mandar koi ladj krik, kolatar darau. Jaake har tu o tchatchepen an o wast leh, hi mishto.

⁴⁰Pen mange, hoi te krap tuke! Tu hal an o tchatchepen tardo. De man pale newi soor an miro djipen!

⁴¹Baro Dewel, ab mange latches, un ab mange ap i rig jaake har tu penal,

⁴²te well man i lab, hoi penau koleske, kai praassell man. Me lau tut pash tiro lab.

⁴³Kre te penap hako tsiro o tchatchepen! Me dikau ap tute, har tu o tchatchepen an o wast leh.

⁴⁴Me kamau tiro drom te djal kanna un hako tsiro.

⁴⁵Hoi tu mange penal, krau me. Doleske djau bachteles miro drom.

⁴⁶Glan i bare rajende rakrau kolestar, hoi tu menge penal, hoi te kras mer, un ladjau man gar.

⁴⁷Kamau tire laba o djijestar, un hom bachtelo te rikrap man ap lende.

⁴⁸Me hadau tire laba pre, un kamau len o djijestar, un mukau len an miro shero trujel te djal.

⁴⁹Ma biste tiro lab, hoi dal tu man, tiro budepaskres! Dikau ap tiro lab, te well jaake har tu les penal.

⁵⁰Har mange o djipen phares his, dal tu man newi soor. Tiro lab mukas man pre djiwell.

⁵¹Ninna te sanenn pre-phurde menshe pral mande, mukom gar tiro drom.

⁵²Baro Dewel, te well mange an o shero, har lal tu an o phuro tsiro o tchatchepen an o wast, palle krell kowa miro dji pale sorelo.

⁵³I choli taprell man, te dikau, har i tchilatche mukan tiro drom.

⁵⁴Kate ap kai phub, kai me gar khere hom, giwau gilja pral tire laba.

⁵⁵Rati weh tu mange an o shero, baro Dewel, te djap ap tiro drom.

⁵⁶Mange hi shukar te krap kowa, hoi tu menge penal.

⁵⁷Me penom mange: O baro Dewel hi o pralstuno an miro djipen. Pal leskre laba kamau te djiwell.

⁵⁸Miro tselo djijeha rodau me tiro kamlepen. Ab mange latches jaake har tu les penal.

⁵⁹Me dau jak, har me miro djipen djiwap, un djau tiro drom jaake har tu les menge sikral.

⁶⁰Me tradom man, un krau sik, hoi tu mandar kameh.

⁶¹I tchilatche tchiwan dorja win trul mande, te perap dren. Me bistrau tiro drom gar.

⁶²Mashkral an i rat stau me pre, te sharap tut, kai lal tu o tchatchepen an o wast.

⁶³Me rikrau man pash kolende, kai djiwenn tuha un krenn, hoi tu peneh.

⁶⁴Baro Dewel, latcho hal i menshenge ap i tseli phub. Sike mande, hoi tu mandar kameh!

⁶⁵Tu hals latches ap mande, tiro budepaskro, jaake har tu kowa penal.

⁶⁶Sike mande te haiwap un djinap, hoi te krap! Tire laba hi mishto. Kowa patsau.

⁶⁷Har djom tiro dromestar tele, dal tu man i phagi. Kanna rikrau tiro lab.

⁶⁸Tu hal latcho un kamlo. Sike mande, hoi tu mandar kameh!

⁶⁹Kol pre-phurde anan chochepen pre ap mande. Miro tselo djijestar krau me kowa, hoi tu menge penal.

⁷⁰Kolla menshe pandan pengre djia, te haiwenn le gar tiro lab. Me hom bachtelo, te djap tiro drom.

⁷¹His mishto mange, te dal man i phagi, te shunap ap tute un krau hoi tu mandar kameh.

⁷²Tiro drom kamau me budeder har bud serja kotja sonakai un rup.

⁷³Tire wasta kran man un rikran man. Kre, te haiwap tire laba!

⁷⁴Kolla, kai djiwenn tuha, wenn bachtelo, te dikenn le, har patsau ap tiro lab.

⁷⁵Baro Dewel, me djinau, tu te deh i phagi, djah tu pal o tchatchepen. Tuke his tchatcho har dal man i phagi.

⁷⁶Kre miro dji pale sorelo dran tiro latchepen, jaake har tu penal ap mande, tiro budepaskro.

⁷⁷Kre tiro dji mange pre, te djiwap! Me hom bachtelo, te djap tiro drom.

⁷⁸Kre, te hunte ladjenn pen kol pre-phurde, kai chochepen ap mande pre anan. Miro djijeha rakrau pral kowa, hoi tu menge penal, te kras mer.

⁷⁹Ach, te rikrens kolla pash mande, kai djiwenn tuha un prindjrenn tire laba, hoi menge sikrenn, har te djiwas.

⁸⁰Muk miro dji ap tiro drom te atchell, te krap, hoi mandar kameh, jaake te hunte ladjap man gar.

⁸¹Miro dji nashell pal tute: Ab ap miri rig! Me dikau ap tute, te rakress mantsa.

⁸²Me dikau mange i jaka win pal kowa, hoi tu mange penal. Kaana weh tu, un khosseh mange i swa tele?

⁸³Me perom an mande khetne har i moljakro gono, hoi pash i jag tchiddo hi. Ninna te hi man buder kek soor, bistrau me gar, hoi tu mandar kameh.

⁸⁴Har rah, baro Dewel, rikreh tut pale, bis te deh kolen i phagi, kai man, tiro budepaskres, palla lenn.

⁸⁵Kol pre-phurde kran chebja, te perap dren, kolla, kai djan gar ap tiro drom.

⁸⁶Tire tsele laba hi o tchatchepen. Kol pre-phurde lenn man palla un anenn chochepen ap mande pre. Ab ap miri rig!

⁸⁷His buder gar bud, palle marans le man an kau them. Me mukom gar tire laba, hoi menge penenn, hoi te kras mer.

⁸⁸Tu hal jaake latcho, de man pale newi soor, te rikrap tire laba, hoi sikrenn menge har te djiwas.

⁸⁹Baro Dewel, tiro lab atchella hako tsireske, un hi soreles tardo an o bolepen.

⁹⁰Tiro tchatchepen atchell jaake rah har menshe koi hi. Tu kral i phub un joi atchella tardo.

⁹¹Jaake har tu kamal, hi li gomme kau diwes tardo. Lauter ap i phub hunte krell, hoi tu kameh.

⁹²Te woms gar bachtelo te djap tiro drom, palle meroms, jaake phares his miro djipen.

⁹³An kek tsiro kamau te bistrap hoi tu menge penal, te kras mer. Dran tire laba rikreh tu man djido.

⁹⁴Me hom tiro un kamau te krap, hoi mange peneh. Doleske ab ap miri rig!

⁹⁵I tchilatche lenn man an i jak, te denn le man mulo. Me dau jak ap tire laba, hoi menge sikrenn, har te djiwas mer.

⁹⁶Me dikom te atchell tchi, witar gar kowa, hoi mishto hi. Tiro lab kokres atchella tardo.

⁹⁷O djijestar kamau tiro drom te djal. O tselo diwes hi tire laba an miro shero.

⁹⁸Tire laba hi hako tsiro miro brawlepen, un krenn man gosweder har kolen, kai mange tchilatchepen kamenn.

⁹⁹Me rakrau miro djijeha pral tire laba, hoi menge sikrenn, har te djiwas. Doleske haiwau budeder har mire sikepangre.

¹⁰⁰Me krau, hoi tu menge penal. Doleske haiwau budeder har i phure.

¹⁰¹Hako tchilatcho dromestar rikrom mire herja pale, te rikrap tiro lab.

¹⁰²Me krau pal tire tchatchepaskre laba. Tu hals miro sikepaskro.

¹⁰³Tiro lab hi har i gudlo chapen mange, awa, gudleder har gwin[74] hi lo.

¹⁰⁴Tiro lab krell man gosewo. Doleske nai dikau gar chochene dromma glan i jaka.

¹⁰⁵Tiro lab hi har i momeli, hoi sikrell, kai te djap, awa, i momeli ap miro drom.

¹⁰⁶Me dom man sowel, un me kamau lat te rikrell: Kamau te djap pal tire tchatchepaskre laba.

¹⁰⁷Miro dji hi phares dukedo, baro Dewel. De man pale newi soor jaake har tu mange penal!

¹⁰⁸Baro Dewel, dik latches ap mire laba, kolentsa parkrau man pash tute. Sike mande tire tchatchepaskre laba.

¹⁰⁹Miro djipen hi hako tsiro gar dur o merepastar. Tiro drom bistrau me gar.

¹¹⁰I tchilatche tchiwan dorja win, te taprenn le man. Me mukau gar tire laba, hoi menge penenn, hoi te kras mer.

¹¹¹Tire laba, hoi menge sikrenn, har te djiwas, hi mange kutch un atchenna mange hako tsiro. Awa, jon hi kolla, hoi miro dji bachteles krenn.

¹¹²Me krau miro dji pre, te krap, hoi tu mandar kameh kanna un hako tsiro.

¹¹³Me choirau man ap kolende, kolen dui djia hi, tiro drom kamau me o djijestar.

¹¹⁴Tu hal kowa, pash koleste man khatrau, un koon peskre wasta pral mande rikrella. Doleske dikau ap tiro lab, hoi tu man dal.

¹¹⁵Djan pale mandar, tumer, hoi krenn o tchilatchepen! Me rikrau ap i laba miro Deblestar.

¹¹⁶Rike man ap o djipen jaake har dal man tiro lab. Ma muk man tchitcheske ap tute te dikell.

¹¹⁷Hade man pre, te nai taprell man kek, un me kamau hako tsiro te krell, hoi mandar kameh.

¹¹⁸Kolen, kai gar krenna, hoi lendar kameh, tradeh tu tutar. Lengro chochepen hi tchitcheske.

¹¹⁹I tchilatchen khosseh tu krik kai phubjatar har tchik. Doleske kamau me tire laba, hoi menge sikrenn, har te djiwas.

¹²⁰Tutar darau jaake, te trissau. Tu deh i phagi kolen, kai shunan gar ap tute.

¹²¹Me krau o tchatchepen, un djau o tchatcho drom. De man gar an o wast kolendar, kai kamenn ap mande pre te djan.

¹²²Me hom tiro budepaskro. Rake mange mishto, te nai djan gar i pre-phurde i sorjah ap mande pre.

¹²³Mire jaka nashenn pal tute: Le man win dran o tchilatchepen, jaake har tu penal an tiro tchatchepen.

¹²⁴Ab latches mange, kai tiro budepaskro hom, un sike mange, hoi tu mandar kameh.

¹²⁵Tiro budepaskro hom me. Muk man tire laba te haiwell, hoi menge sikrenn, har te djiwas.

¹²⁶Kanna hi o tsiro, kai o baro Dewel hunte krell tchomone. Jon peran tiro dromestar tele.

¹²⁷Me kamau tire laba budeder har o sonakai, awa, budeder har o latcheder sonakai.

¹²⁸Tire tsele laba, hoi menge penal, hi mange mishto. Kamau tchi te djinell i chocheno dromestar.

¹²⁹Tire laba, hoi sikrenn menge, har te djiwas, kolla sikrenn tiri bari soor. Doleske rikrau len o djijestar.

¹³⁰Te haiwah tiro lab, palle krell men kowa bachtelo, un ninna kolla, kai tchi djinenn, wenn gosewo.

¹³¹Me krau miro mui dur pre, un pijau tiro lab, jaake bud trush hi man pal tire laba.

¹³²Risse tut pash mande, un ab mange latches, jaake har kolenge hal, kai kamenn tut o djijestar.

¹³³Muk te atchap soreles ap tiro drom, jaake har tu penal, te well o tchilatchepen kek rai pral mande!

¹³⁴Le man win dran i wasta kolendar, kai man tikno rikrenn, un me kamau kowa te krell, hoi tu menge penal.

¹³⁵Dik latches ap mande, tiro budepaskro, un sike mange, hoi tu mandar kameh!

¹³⁶Rowau bud swa pral kolende, kai mukenn tiro drom.

¹³⁷Baro Dewel, tu hal an o tchatchepen tardo, un tire tchatchepaskre laba hi mishto.

¹³⁸Tire laba, hoi sikrenn menge, har te djiwas, kolla lauter hi tchatcho un mishto.

¹³⁹I choli tapras man un kamas man pre te chatchrell, har dikom, kai bistran kolla tire laba, kai mange o djipen phares krenna.

¹⁴⁰Tire laba hi latcho un tchatcho, un me, tiro budepaskro, kamau len miro tselo djijeha.

¹⁴¹Ninna te hom gar an-diklo, un i menshe dikenn tele ap mande, bistrau me tchi, hoi menge penal, te kras mer.

¹⁴²Tiro tchatchepen atchella hako tsiro, un tiro drom hi tchatcho.

¹⁴³Ninna te hi miro djipen pharo un i daar tapras man, hom bachtelo pral tire laba.

¹⁴⁴Tire laba, hoi menge sikrenn, har te djiwas, atchenna hako tsiro tchatcho. Sike mande, har te haiwap len! Palle djiwau.

¹⁴⁵O tselo djijeha dom me gole. Shun man, mo baro Dewel! Me kamau lauter te krell, hoi tu mandar kameh.

¹⁴⁶Ap tute dom me gole. Ab ap miri rig! Me kamau man te rikrap ap tire laba, hoi mende sikrenn, har te djiwas.

¹⁴⁷Sik taissarlakro dau me gole ap tute, te wess ap miri rig, un dau jak, te rakreh ap mande.

¹⁴⁸Ninna an i rat djangrau pre, un rakrau miro djijeha pral tire laba.

¹⁴⁹Shun man, hoi me penau! Baro Dewel! Tu hal jaake latcho! De man pale newi soor tire tchatchepaskre labentsa!

¹⁵⁰Kol tchilatche, kai man palla lenn, hi buder gar dur mandar. Tiro dromestar hi le dur.

¹⁵¹Baro Dewel, tu hal pash mande. Un tire tsele laba hi o tchatchepen.

¹⁵²I rah tsiro prindjrau tire laba, hoi menge sikrenn, har te djiwas. Tu kral, te atchenn le hako tsireske.

¹⁵³Dik, har djungeles mange djal un le man win dran i bibacht! Tiro drom bistrom me gar.

¹⁵⁴Le tu miro koowa an tiro wast, un le man win dran i tchilatche wasta! De man pale newi soor jaake har tu mange penal!

¹⁵⁵I tchilatche krenn gar, hoi tu lendar kameh. Doleske tchiweh tu len gar an o tchatchepen.

¹⁵⁶Baro Dewel, tu kreh tiro dji dur pre menge. De man pale newi soor tire tchatchepaskre labentsa!

¹⁵⁷Bud hi kolla, kai man palla lenna, un les mange phares krenna. Me mukau gar tire laba, hoi menge sikrenn, har te djiwas.

¹⁵⁸Me nai dikau kol phukepangren gar glan i jaka, kai rikrenn pen gar ap tire laba.

¹⁵⁹Dik, har me kamau tire laba, hoi menge penenn, hoi te kras mer. Baro Dewel, tu hal jaake latcho, de man pale newi soor!

¹⁶⁰Tiro tselo lab hi o tchatchepen. Un tire tsele tchatchepaskre laba atchenna hako tsireske.

¹⁶¹Raja lenn man palla, ninna te krom me lenge tchi, tire laba kokres hi kolla, kai me darau man lendar.

¹⁶²Pral tiro lab hom jaake bachtelo har jek, kai las bud brawlepen.

¹⁶³Chochepen hi mange djungelo, un me nai dikau les gar glan i jaka. Tiro drom kamau me o djijestar.

¹⁶⁴Jaake har tu o tchatchepen wi-rakreh, hi kowa mishto. Un me sharau tut koleske efta kope an o diwes.

¹⁶⁵I bari bacht hi kolen, kai tiro drom kamenna. Jon perenn gar tiro dromestar tele.

¹⁶⁶Baro Dewel, dikau ap tute, te tchiwess man an o tchatchepen, un krau, hoi mandar kameh.

¹⁶⁷Miro tselo djijeha rikrau man ap tire laba, hoi menge sikrenn, har te djiwas, un kamau len bud un budeder.

¹⁶⁸Me rikrau tire laba, hoi menge penenn, hoi te kras un har te djiwas; lauter, hoi krau, dikeh tu.

¹⁶⁹Baro Dewel, shun miro ropen! Muk man tire laba te haiwell, jaake har tu penal!

¹⁷⁰Shun koi gole miro djijestar! Le miro djipen win dran i bibacht jaake har tu mange penal!

¹⁷¹Tu sikreh mange, hoi mandar kameh. Doleske kamell miro mui tuke te giwell.

¹⁷²Miri tchip kamell tiro lab te giwell. Tire tsele laba hi mishto un tchatcho.

¹⁷³De man tiro wast, hoi hadell man! Me krom miro dji pre, te rikrap tire laba, hoi menge penenn, hoi te kras mer.

¹⁷⁴Baro Dewel, miro tselo djijeha kamau, te tchiwess man an o tchatchepen. Me hom bachtelo te djap tiro drom.

¹⁷⁵Muk man te djiwell, te sharap tut, kre man soreles tire tchatchepaskre labentsa.

¹⁷⁶Me hom har i bakro, hoi nashedo djas. Rode man, tiro budepaskres, me bistrom tire laba gar!