Read O Debleskro Drom - I Bibla an o Romano Rakepen 2021 Debleskri gili 130 Bible Online

Debleskri gili 130 - O Debleskro Drom - I Bibla an o Romano Rakepen 2021 bible

Debleskri gili 130

¹I gili te giwell ap o drom an Jerusalem. Dran o telstunepen miro djijestar dau me gole ap tute, baro Debleste.

²Miro rai, shun man! Shun, har ap tute rowau!

³Te tchinals tu, baro Dewel, mari doosh an i liil, koon nai atchals palle glan tute tardo?

⁴Tu hal kowa, kai i doosh krik lella. Doleske dikah pre ap tute un shunah ap tute.

⁵Ap tute, baro Dewel, rikrau me, miro tselo djijestar dikau ap tute, te rakress mantsa.

⁶Miro dji dikell ap o Debleste, miro rajeste, te well lo ap miri rig. Un o tsiro well mange rah, budeder har kolenge, kai rati jak denn ap o foro un kamenn, te well sik o diwes. Awa, budeder har kolla!

⁷Tu, Israel, dik ap o baro Debleste! Job hi latches menge, un leskro dji hi hako tsiro pre, te lell lo men win dran o tchilatchepen.

⁸Awa, job lell o kheer Israel win dran leskri tseli doosh.