Read O Debleskro Drom - I Bibla an o Romano Rakepen 2021 Debleskri gili 139 Bible Online

Debleskri gili 139 - O Debleskro Drom - I Bibla an o Romano Rakepen 2021 bible

Debleskri gili 139

¹I gili o rajeske pral i gipangre. Kai gili kras o David. Baro Dewel, tu dikeh an miro dji un prindjreh man mishto.

²Tu prindjreh miro beshepen un miro tardepen. Tu haiweh fun dural, hoi an miro shero trujel djal.

³Te djau win, un te hom tchiddo, tu hal pash mande. Mire tsele dromma, tu prindjreh len.

⁴O lab hi gomme gar ap miri tchip, koi djineh tu, baro Dewel, hoi kamau te rakrap.

⁵Haki rigjatar lal tu man trujel, un rikreh tiro wast pral mande.

⁶Tu prindjreh man jaake mishto, kowa hi mange bares un phares. Me nai haiwau kowa gar.

⁷Kai djau me nai, te wap dur tutar? Kai nashap, kai tu man gar dikeh?

⁸Te djoms an o bolepen pre, palle hal tu koi. Te tchiwoms man pash i mulende, ninna kote wals tu koi.

⁹Te hadoms man har i tchirklo un djoms kote, kai o kham pre-djala, un mukoms man tele pal o baro pani, kai o kham tele djal,

¹⁰ninna kote taprals man tiro wast un rikrals man.

¹¹Un penaus me: “Kali rat te khatrell man, un tamlepen[79] te well trul mande”,

¹²palle wals tuke i rat gar kali, awa, i rat wals har o diwes, un o tamlepen har i momeli.

¹³Tu kral lauter, hoi an mande hi. An miri date tchiwal man khetne.

¹⁴Me parkrau man pash tute, te kral man jaake shukar. Ap mande dikau, lauter hoi kreh, hi jaake mishto, te atchell mange o rakepen krik.

¹⁵Me homs gar khatedo glan tute, har kral man kote, kai kek dikell, har wom i ternepen an miri dakro per.

¹⁶Tu dikal man, har gar kerdo homs, un hako diwes miro djipastar his tchinlo an tiro liil, har gomme kek lendar koi his.

¹⁷Phares te haiwell hi mange kowa, hoi tu an tiro shero rakreh, mo Dewel. Har bud hi kowa!

¹⁸Te kamoms les tele te ginell[80], wals kowa budeder har i santa pash o baro pani. Te stau pre o wawar diwes, hom gomme pash tute.

¹⁹Mo Dewel, kamoms te dess tu i tchilatchen mulo! Kamoms, te djan penge kolla, kolen doosh ap o rat i wawarendar hi!

²⁰Jon, kai praassenn tut un hadenn pen ap tute, lenn tiro lab an o mui te chochenn le.

²¹Baro Dewel, hunte choirap man gar ap kolende, hoi pen ap tute choirenn? Mange well djungeles, te dikau kolen, kai hadenn pen ap tute.

²²Kolla, kai kamenn tut gar, kamau me witar gar. Awa, nai dikau len gar glan mire jaka.

²³Dik an miro dji, miro Dewel, un dik, hoi lauter koi dren hi! Un le man an o jak, un dik, hoi mange an o shero trujel djala!

²⁴Un te dikeh, te hom ap i drom, hoi tutar krik djala, palle ab un le man pale ap ko drom, hoi pash tute djala!