Read O Debleskro Drom - I Bibla an o Romano Rakepen 2021 Debleskri gili 140 Bible Online

Debleskri gili 140 - O Debleskro Drom - I Bibla an o Romano Rakepen 2021 bible

Debleskri gili 140

¹I gili o rajeske pral i gipangre. Kai gili kras o David.

²Baro Dewel, le man win dran i wasta kol tchilatchendar! Khate man glan i marepangre!

³Kolen hi tchilatchepen an o dji, un krenn tchingepen hako diwes.

⁴Lengre tchipja denn tchurje har sapengre tchipja, lengre laba anenn o merepen.

⁵Baro Dewel, de ap mande jak, te taprenn man i tchilatche gar! Khate man glan i marepangre, glan kolende, kai kamenn te perap!

⁶Kol pre-phurde tchiwan mange dorja win, te stakrap dren un perap. Jon tchiwan i netsa win ap miro drom, te taprenn le man.

⁷Me penom ap o baro Debleste: Tu hal miro Dewel. Baro Dewel, shun, har ap tute rowau!

⁸Baro Dewel, miro rai, tu hal o sorelo ap miri rig. Tu rikreh tire wasta pral mande an o kurepaskro tsiro.

⁹De kol tchilatchen gar, hoi jon kamenna! Kowa, hoi jon pen glan lan, muk gar te djal, te hadenn le pen gar!

¹⁰Kolla, kai trul mande hi, kamenn mange bibacht. Muk koi bibacht ap lende pale te djal!

¹¹Muk jagakre barra[81] ap lende te perell! Witse len an i jag! Muk len te perell an o telstunepen, jaake te nai stenn le buder gar pre!

¹²Koles i tchilatchi tchip hi, koles te well kek bacht an kau them! Un i marepangre, te wenn le tradedo i bibachtjatar un hunte perenn!

¹³Me djinau, te lell o baro Dewel i tchorwelengro koowa an peskro wast, un dell jak, te lenn le pengro tchatchepen.

¹⁴Awa, i tsiro wella kolenge, kai an o tchatchepen tardo hi, te sharenn le tut. Un kolla, kai o tchatcho drom djan, djiwenna pash tute.