Read O Debleskro Drom - I Bibla an o Romano Rakepen 2021 Debleskri gili 141 Bible Online

Debleskri gili 141 - O Debleskro Drom - I Bibla an o Romano Rakepen 2021 bible

Debleskri gili 141

¹I gili o Davidestar. Baro Dewel, ap tute dau me gole. Ab sik pash mande! Shun ap mande ap ko tsiro, kai ap tute gole dau!

²Muk miro mangepen tuke jaake shukar te well, har chatchroms me tuke sungepaskro koowa. Dik ap mire pre-hadede wasta jaake har ap i viecho, hoi mukoms tuke rati te chatchrell.

³Baro Dewel, de jak ap miro mui, de garda ap miri tchip.

⁴Muk miro dji gar o tchilatchepen palla te dell, te krap gar midjak koowa khetne i tchilatchentsa. Muk man gar te chap lengro shukar chapen!

⁵Latche menshe mu denn man i phagi, un tchingrenn mantsa an o latchepen. I tchilatchendar kamau gar, te sharenn le man.[82] Un me mangau o Deblestar, te krenn le mange kek tchilatchepen.

⁶Ap ko diwes, kai well i phagi pral lengre pralstunende wi-rakedo, wenn jon i barrengri berga tele witsedo. Palle well diklo, har tchatcho mire laba pral lende his.

⁷Jaake har o hacho i phub pre phagell un trujel witsrell, jaake hi lengre kokale trujel tchiddo. Un o mulengro them krell peskro mui lenge pre.

⁸Ap tute, baro Dewel, dikenn mire jaka. Pash tute kamau me man te khatrell. Muk man gar te merell!

⁹De jak ap mande, te perap gar an i dorja, hoi jon mange wi-tchiwan, awa, te perap gar kote dren, kai i tchilatche kamenn man te taprell.

¹⁰Muk len lauteren kokres te perell an pengri netsa, hoi jon mange wi-tchiwan, un man muk te nashap mange!