Read O Debleskro Drom - I Bibla an o Romano Rakepen 2021 Debleskri gili 143 Bible Online

Debleskri gili 143 - O Debleskro Drom - I Bibla an o Romano Rakepen 2021 bible

Debleskri gili 143

¹I gili o Davidestar. Baro Dewel, shun miro mangepen! De jak ap miro ropen! Tu hal latcho un tchatcho! Doleske shun man!

²De man, tiro budepaskres, kek phagi; glan tute hi kek mensho an o tchatchepen tardo.

³Kowa, kai mange tchilatchepen kamell, lell man palla, stakrell miro djipen an i phub. Me hom har an i stilepen, kai kali rat hi, hom har kolla, kai meran glan i rah tsiro.

⁴Bari daar hi an miro dji. Miri tseli soor, hoi an mande his, nashrom.

⁵Mange djal kowa an o shero, hoi tu lauter kral glan i rah tsiro. Pral kowa, hoi tire wasta kran, rakrau miro djijeha.

⁶Mire wasta hadau pre pash tute. Har i truk them trushella pal pani, jaake trushell miro dji pal tute.

⁷Baro Dewel, shun man sik! Man hi buder kek soor. Ma khate tut mandar, te wap gar har kolla, kai hunte merenn.

⁸Ap i tsalla muk man tiro latchepen te shunell. Me dikau ap tute. Sike man hawo drom me hunte djap. Miro dji nashell pal tute.

⁹Baro Dewel, le miro djipen win dran i wasta kolendar, kai ap mande djan. Pash tute wau, te khatrap man.

¹⁰Sike mange, hoi tuke shukar hi, te krap me, tu hal miro Dewel. Tiro latcho ducho mu sikrell man o tchatcho drom.

¹¹Baro Dewel, rike tire wasta pral miro djipen jaake har penal. Tu hal an o tchatchepen tardo. Doleske le man win dran i bibacht!

¹²Tu hal jaake latcho ap mande. Doleske le kolen krik, kai ap mande djan, un mare lauteren, kai mange miro djipen phares krenn. Me hom tiro budepaskro!