Read O Debleskro Drom - I Bibla an o Romano Rakepen 2021 Debleskri gili 149 Bible Online

Debleskri gili 149 - O Debleskro Drom - I Bibla an o Romano Rakepen 2021 bible

Debleskri gili 149

¹Sharedo well o baro Dewel! Giwenn o baro Debleske i newi gili! Sharenn les kote, kai leskre menshe khetne wenna!

²Tu Israel, tiro dji mu bashrell pral koleste, kai kras tut. Tumer menshe dran Zion, giwenn i bachtjatar pral tumaro baro rajeste.

³Sharenn leskro lab an tumaro khelepen! Bashrenn leske ap i pauka un i harfa!

⁴O baro Dewel dikell latches ap peskre menshende. Job well kolenge ap i rig, kai tele rikedo hi un hadell len pre.

⁵Kolla, kai leskre hi, mu giwenn i bachtjatar! Ninna an i rati mu sharenn le les un hadenn le les.

⁶Lengre muja denn bari gole, te sharenn le pengro Debles. An lengre wasta well len i charo, hoi ap dui rigja tchinella,

⁷jaake te denn le i menshen an wawar themma pale, hoi kolla ap lende kran, un anenn i phagi pral i natsjone.

⁸Lengre bare rajen pandenn le an shelle, lengre pralstunen an sasterne shelle,

⁹un anenn o tchatchepen pral lende, har kowa tchinlo hi an o Debleskro lab. Jaake well o railepen o Debleskre menshendar diklo. Sharedo well o baro Dewel!