Read O Debleskro Drom - I Bibla an o Romano Rakepen 2021 Debleskri gili 25 Bible Online

Debleskri gili 25 - O Debleskro Drom - I Bibla an o Romano Rakepen 2021 bible

Debleskri gili 25

¹I gili o Davidestar. Baro Dewel, miro mangepah wau pash tute.

²Ap tute rikrau man, miro Dewel. Muk man gar tchitcheske ap tute te dikell, te nai san kolla pral mande, kai kamenn mange tchilatchepen.

³Kek, kai pes ap tute rikrell, hunte ladjell pes. Kolla, kai phukrenn ap tute tchitcheske, hunte ladjenn pen.

⁴Baro Dewel, sike man tiro drom, un hoi tu mandar kameh!

⁵Sike mande, har te djiwap miro djipen an tiro tchatchepen! Tu hal miro Dewel, kai rikrell man! Hako diwes dikau ap tute.

⁶Miro baro Dewel, ma biste tiro kamlepen un tiro latchepen, hoi hako tsiro ap tire menshende sikral.

⁷Biste miri doosh, hoi ap mande lom, har terno homs, un miro tchilatcho koowa! Kre mange tiro dji pre, miro baro Dewel!

⁸Latcho un tchatcho hi o baro Dewel. Doleske sikrell lo kolen, kai doosh ap pende lan, o tchatcho drom.

⁹Kolen, kai tele rikedo hi, anell lo ap o tchatcho drom, un sikrell lende, hoi lo lendar kamella.

¹⁰I tsele dromma hi latcho un tchatcho, kai o baro Dewel kolen anell, kai rikrenn pen ap leskre laba un krenn, hoi job lenge penell.

¹¹Baro Dewel, kre tiro lab baro, un le miri doosh mandar krik, hoi jaake bares hi!

¹²Hoi hi ko mursheha, kai djiwell o baro Debleha? Koleste sikrell lo hawo drom job te djal.

¹³Kowa djiwella an i bacht, un leskre tchawenge hi o them.

¹⁴O baro Dewel hi o maal kolenge, kai djiwenn leha, un lende sikrell lo, te hi lo lengro Dewel un jon peskre menshe.

¹⁵Mire jaka dikenn hako tsiro ap o baro Debleste, job lell mire pire dran i netsa win, kai jon dren pandle hi.

¹⁶Risse tut pash mande, un kre tiro dji mange pre, me hom jaake muklo un kokres.

¹⁷I daar an miro dji hi baro. Le man win dran miri bibacht!

¹⁸Dik ap miro pharo djipen, un har djungeles mange djala, un biste miri tseli doosh!

¹⁹Dik, har bud kolla hi, kai kamenn mange tchilatchepen, un hawi bari choljah jon pen ap mande choirenna!

²⁰Rike tiro wast pral miro djipen, un le man dran lengre wasta win! Muk man gar tchitcheske pash tute te well un ap tute te dikell!

²¹Me rikrau man ap tute miro tselo djijestar. Doleske muk man te djiwap miro djipen an djudjepen un tchatchepen.

²²Miro Dewel, le o Israel win dran kau tselo parepen, hoi ap leste hi!