Read O Debleskro Drom - I Bibla an o Romano Rakepen 2021 Debleskri gili 26 Bible Online

Debleskri gili 26 - O Debleskro Drom - I Bibla an o Romano Rakepen 2021 bible

Debleskri gili 26

¹I gili o Davidestar. Baro Dewel, de man miro tchatchepen! Kek doosh hi ap mande. Un me patsau tut, mo baro Debles, un perom gar tutar tele.

²Le man an i jak, baro Dewel! Dik palla, hoi an miro dji hi, un hoi mange an o shero trujel djal!

³Tiro latchepen hi glan mire jaka, un me djiwau miro djipen an tiro tchatchepen.

⁴Me beshau gar khetne chochene menshentsa. Un kolentsa, kai rakrenn dui tchipjentsa, hom gar khetne.

⁵Me kamau gar kote te djal, kai i tchilatche khetne wenna, un kolendar, kai midjak koowa krenna, rikrau man pale.

⁶Me thowau mire wasta, te sikrap, kai hi kek doosh ap mande, un djau kote, kai wenn vieche tuke chatchedo,

⁷un parkrau man pash tute, un rakrau pral ko tselo baro koowa, hoi tu lauter kral.

⁸Me kamau o kheer, kai tu djiweh, miro tselo djijestar, un koi platsa, kai tiro railepen diklo wella.

⁹Ma de man mulo khetne i tchilatchentsa! Le mange gar o djipen khetne kolentsa, kai ap rat win djan,

¹⁰kolengre wasta pherdo midjak koowa hi, un jon i lowenge chocheno koowa krenn.

¹¹Me djiwau an kek tchilatchepen. Ab mange latches un le man win dran o merepen!

¹²Mire herja hi soreles tardo un perenn gar o tchatcho dromestar tele. Me kamau miro baro Debles te sharell, kote, kai leskre menshe khetne wenna.