Read O Debleskro Drom - I Bibla an o Romano Rakepen 2021 Debleskri gili 28 Bible Online

Debleskri gili 28 - O Debleskro Drom - I Bibla an o Romano Rakepen 2021 bible

Debleskri gili 28

¹I gili o Davidestar. Tu, baro Dewel, hal mange har i baro sorelo bar, kai nai khatrau man. Ap tute dau me gole. Ma risse tire kanda mandar! Tu te shuneh gar, har gole dau, palle hom jaake har kolla, kai pash i mulende an o mulengro them djan.

²Shun ap miro ropen! Shun, har ap tute gole dau! Dik ap mire wasta, hoi me pre-hidjrau pash tiro kheer, kai tu hal!

³Ma kre mantsa har i tchilatchentsa un kolentsa, kai krenn i wawarenge tchilatchepen, kai rakrenn latches, un an lengro dji hi tchilatchepen!

⁴Kre lentsa pal kowa, hoi jon kran, pal lengro tchilatchepen, hoi jon kran, pal kowa, hoi jon pengre wastentsa kran! De len pale pal kowa, hoi kran le i wawarenge!

⁵Jon dikenn gar ap kowa, hoi o baro Dewel krell, witar gar ap kowa, hoi job peskre wastentsa kras. Doleske witsrell lo len ap i phub, te nai stenn le buder gar pre.

⁶Sharedo well o baro Dewel, job shunas miro ropen.

⁷O baro Dewel hi miri soor, un rikras peskro wast pral mande. Ap leste patsau miro tselo djijeha. Un job was ap miri rig. Kanna stell miro dji, un hi bachteles, un me kamau les sharell un leske giwell.

⁸O baro Dewel hi o sorelo ap i rig peskre menshendar. Un o baro rajeske, hoi job wi-rodas, hi lo har i baro sorelo kheer.

⁹Ab ap i rig tire menshenge! Tchip tiri soor un tiri bacht ap mende, kai tiro ham! Ab hako tsiro har i bakrengro menge, kai dell jak ap peskre bakrende un dell len lauter, hoi len hunte well djipaske!