Read O Debleskro Drom - I Bibla an o Romano Rakepen 2021 Debleskri gili 29 Bible Online

Debleskri gili 29 - O Debleskro Drom - I Bibla an o Romano Rakepen 2021 bible

Debleskri gili 29

¹I gili o Davidestar. Tumer bolepangre, sharenn o baro Debles! Sharenn leskro railepen un leskri soor!

²Krenn leskro lab baro! Awenn un witsrenn tumen tele glan o baro Debleste, te well lo an peskre shukar un kutch ripja!

³O baro Debleskro rakepen well shunlo pral i panja. Te dell o sorelo Dewel gole, hi kowa har koi bari gole, hoi dell o bolepen, te dell baro brishin[17]. O baro Dewel hi o rai pral i tsele bare panja.

⁴Leskro rakepen hi pherdi soor, un sikrell hawo baro rai job hi.

⁵O baro Debleskro rakepen phagella sorele ruka, ninna kol zedertikre ruka ap i berga Libanon.

⁶Job mukell len te stell har i terne grumja, I berga Libanon mukell lo te stell har i terni grumni stell, un i berga Sirjon har i terno diwjo gurum[18].

⁷Te rakrell o baro Dewel, dell jag karje dran o bolepen.

⁸Te rakrell o baro Dewel, trissell[19] o mulo tato them. O baro Dewel mukell te trissell o mulo tato them, hoi kharella Kadesh.

⁹Te rakrell o baro Dewel, anenn i wesheskre grumja pengre terne ap i phub. Ninna nashrenn i ruka pengre patria an i wesha. An o Debleskro kheer dell hakeno gole: “Har baro hi o Dewel!”

¹⁰O baro Dewel hi beshdo pral i panja. O baro Dewel hi o baro rai hako tsireske.

¹¹O baro Dewel dell peskre menshende soor, ninna bacht un latcho koowa.