Read O Debleskro Drom - I Bibla an o Romano Rakepen 2021 Debleskri gili 31 Bible Online

Debleskri gili 31 - O Debleskro Drom - I Bibla an o Romano Rakepen 2021 bible

Debleskri gili 31

¹I gili o rajeske pral i gipangre. O David kras kai gili.

²Baro Dewel, pash tute wau, te rikress tire wasta pral mande. Muk man gar tchitcheske pash tute te well! Tu hal latcho un tchatcho. Doleske le man dran i tchilatche wasta win!

³Shun, har dau ap tute gole, un ab sik ap miri rig! Ab mange har i baro sorelo bar, kai nai khatrau man! Ab mange har i sorelo kheer, te nai hatsell man kek!

⁴Awa, tu hal mange har i sorelo kheer ap i baro bar. Dja mantsa un an man ap i drom, kai kek nai taprell man, te well tiro lab sharedo.

⁵Tserde man dran koi netsa win, hoi kran le, te perap dren. Tu hal o sorelo, kai ap miri rig hi.

⁶Me dau man an tire wasta. Tu leh man dran i tchilatche wasta win, baro Dewel. Tu hal i Dewel, kai rikrell peskro lab.

⁷Me nai dikau kolen gar glan i jaka, kai mangenn wawar deblen an. Me rikrau man ap tute, baro Dewel.

⁸Miro dji sal un me stau i bachtjatar pral tiro latchepen. Tu dikal, har mange djungeles djas, un djinal, har pharo miro djipen his.

⁹Tu dal man gar an i wasta kolendar, kai mange tchilatchepen kaman. Kanna nai djau, kai me kamau.

¹⁰Baro Dewel, ab latches mange! Me djiwau an i daar, mire jaka hi pesso o ropastar. Un kek soor hi buder an mande.

¹¹I daar chas miro djipen pre, un mire bersha his pherdo ropen. Miri doosh lell miri soor mandar, jaake te djap bango.

¹²Kolla, kai mange tchilatchepen kamenn, san pral mande. Gomme djungleder kran mange kolla, kai djiwenn langs mande. Mire mala trashenn mandar. Te dikenn le man ap o drom, nashenn le penge mandar.

¹³Bud bistran man, har te woms mulo un paskedo. Lenge hom har i phagedo tcharo, hoi krik witsedo was.

¹⁴Me shunau, har rakrenn le djungeles pral mande. I traash hi trul mande. Jon tchiwenn pen khetne, un rodenn i drom, har te denn le man mulo.

¹⁵Baro Dewel, me rikrau man ap tute. Miro Dewel hal tu.

¹⁶Miro djipaskro tsiro hi an tire wasta. Le man win dran i wasta kolendar, kai mange tchilatchepen kamenn, un man palla lenn.

¹⁷Dik latches ap mande! Me hom tiro budepaskro! Ab kamles mange un tserde man dran lengre wasta win!

¹⁸Baro Dewel, muk man gar tchitcheske gole te dell ap tute! Kre, te ladjenn pen i tchilatche! Jon mu djan tele un merenn! Palle nai rakrenn le buder gar,

¹⁹kolla chochene, kai hi pre-phurde un praassenn kolen, kai an o tchatchepen tardo hi.

²⁰Har baro hi tiro latchepen, miro Dewel, kolenge, kai djiwenn tuha! Hakeneste sikreh tu, har latcho tu kolenge hal, kai rikrenn pen ap tute.

²¹Tu khatreh len pash tute kol menshendar, kai tchiwenn pen khetne, te krenn le lenge tchilatchepen. Tu mukeh kek praassepen pral lende te well.

²²Baro Dewel, parkrau man pash tute. Tu sikral tiro baro latchepen ap mande, har homs har i foro, trul koleste bud lurde tarde his.

²³Me homs jaake dareno, te penom: “Mo Dewel, tu kameh mandar buder tchi te djinell!” Kowa his gar jaake: Tu shunal man, har rowom ap tute.

²⁴Kamenn o baro Debles o tselo djijestar, tumer kai leskre han! Koon ap leste patsella, hi an leskro wast. Koon pes pre phurdell, ap koleste well leskri choli.

²⁵Awenn soreles an tumaro dji, un ma darenn, tumer halauter, kai dikenn ap o baro Debleste.