Read O Debleskro Drom - I Bibla an o Romano Rakepen 2021 Debleskri gili 38 Bible Online

Debleskri gili 38 - O Debleskro Drom - I Bibla an o Romano Rakepen 2021 bible

Debleskri gili 38

¹I gili o Davidestar, te bistrell les o Dewel gar.

²Baro Dewel, ma tchinge ap mande an tiri choli! Ma de man i phagi an tiri choli!

³Tu dal karje ap mande un dukral man, un tiro wast das man ap i phub tele.

⁴Ap miro mass hi buder tchi sasto dran tiri choli. Ninna mire kokale dukrenna. Dran miri doosh was kowa ap mande.

⁵Miri doosh was jaake bares an mande, te djal li pral miro shero. Me nai hidjrau lat gar, jaake pharo hi li.

⁶Miro bud dukepen khandella, un i djelto pani djal dran o dukepen win. Dran miro dinlepen well kowa ap mande.

⁷Me nashau bango i dukatar, har te loms dawa. Un o tselo diwes rowell miro dji.

⁸An mande chatchrell i tatepen, un tchi ap mande hi sasto.

⁹Kek soor hi buder an mande, un me hom phagedo. Miro dji hi jaake dareno, kai dau gole i dukatar.

¹⁰Miro rai, tu djineh, hoi me miro djijestar kamau, un miro tselo ropen hi gar khatedo glan tute.

¹¹Miro dji djal sikeder. Miri soor mukas man. Un mire jaka nashran pengri soor.

¹²Mire mala un mire menshe darenn glan miro nasslepen. Un kolla, kai pash mande djiwenna, hi dur mandar krik tardo.

¹³Kolla, kai kamenn man te marell, tchiwenn mange dorja win, te perap dren. Kolla, kai rodenn miri bibacht, rakrenn khetne, hoi nai krenn le mantsa. O tselo diwes rodenn le pal kowa, har nai chochenn le man.

¹⁴Me krau har nai shunoms tchi, un krau miro mui gar pre har jek, kai buder gar nai rakrell.

¹⁵Awa, me wom har i mursh, kai buder tchi shunell, kai les buder kek lab an o mui hi, hoi job pale nai rakrell.

¹⁶Tchatchepah, me tchiwau miro tselo patsepen ap tute, baro Dewel, te rakress tu mantsa, mo rai un mo Dewel.

¹⁷Un me penom tuke: “Ma muk len te sal pral mande!” Me te peroms, sharans jon pen pral mande.

¹⁸Hi buder gar dur, te perap, un mire duka hi hako tsiro glan mire jaka.

¹⁹Doleske penau tuke, hawo tchilatcho koowa me krom, un miri doosh khaitell man.

²⁰Kolla, kai mange tchilatchepen kamenna, hi soreles un hi bud. Bud choirenn pen ap mande, ninna te krom len tchi.

²¹Awa, jon denn man tchilatchepen ap o latchepen pale. Un tchingrenn ap mande, kai krom o latchepen.

²²Ma biste man, baro Dewel! Miro Dewel, ab gar dur mandar!

²³Ab sik ap miri rig! Miro rai, tu hal kowa, kai man dran lengre wasta win lell.