Read O Debleskro Drom - I Bibla an o Romano Rakepen 2021 Debleskri gili 48 Bible Online

Debleskri gili 48 - O Debleskro Drom - I Bibla an o Romano Rakepen 2021 bible

Debleskri gili 48

¹I gili jekestar dran i familja Korach.

²O baro Dewel, sorelo hi lo! Maro Dewel, moldo hi lo, te sharas les an peskro foro, hoi hi pral ap koi berga, kai job djiwella.

³Shukar hi o foro ap i berga Zion. I bacht hi i tseli phubjake. An kau foro hi o Dewel o baro rai.

⁴Job hi an i sorele khera[25] an kau foro. Un i menshe kote djinenn, te dell lo garda ap lende.

⁵Bare raja dran wawar themma wan khetne un djan khetne pengre lurdentsa pash o foro pre.

⁶Jon dikan kowa un lenge atchas o dji tardo. Len tapras i daar un jon nashan penge.

⁷Lengri daar his jaake baro, te trissan le. Lengri traash his har i traash i djuwjatar, kai lell li i ternepen.

⁸Lengre kokale djan, har i bare shiffe phagenn, te djal i sorelo ducho pral o baro pani.

⁹Jaake har mer kowa shunam, jaake dikam les an o foro o baro Deblestar, kai hi o rai pral o bolepen un i phub. Job rikrell o foro un mukell les gar tele te djal an kek tsiro.

¹⁰Maro Dewel, kate an tiro kheer mukah menge tiro latchepen an o shero trujel te djal.

¹¹Jaake baro har tiro lab, maro Dewel, jaake baro hi tiro railepen ap i tseli phub. Tiro tchatcho wast hi pherdo tchatchepen.

¹²Pral kowa hi kol menshe ap i berga Zion bachtelo. Tu dal men maro tchatchepen. Doleske denn le gole i bachtjatar an i tsele forja an o them Juda.

¹³Nashenn trul i berga Zion trujel! Dikenn, kitse bare turme koi hi!

¹⁴Denn jak ap i pre-tchidde barra trul o foro un i sorele khera an o foro, jaake te nai penenn kowa tumare tchawenge.

¹⁵Penenn lenge: Awa, kawa Dewel hi maro Dewel kanna un hako tsireske. Job djal mentsa an maro tselo djipen.