Read O Debleskro Drom - I Bibla an o Romano Rakepen 2021 Debleskri gili 6 Bible Online

Debleskri gili 6 - O Debleskro Drom - I Bibla an o Romano Rakepen 2021 bible

Debleskri gili 6

¹I gili o rajeske pral i gipangre, te giwell pash o bashepen ap i bashepaskri ochta dorjentsa. O David kras kai gili.

²Baro Dewel, tu hal chojedo ap mande. Ma de man sawi bari phagi! Ma de man gar an tiri choli!

³Baro Dewel, ab latches ap mande, mange djal gar mishto! Baro Dewel, kre man pale sasto! Man hi buder kek soor an mande.

⁴Man hi bari traash. Ach, baro Dewel, har rah hal tu chojedo ap mande?

⁵Risse trujel, baro Dewel, un le man win! Tu hal jaake latcho, le man win!

⁶Te hom mulo, nai sharau me tut buder gar. Pash i mulende parkrenn le pen gar pash tute.

⁷Khino hom o ropastar. I tseli rat nashenn mire swa, un miro tchiben hi sapenes lendar.

⁸Me dikau buder gar mishto, — jaake pharo hi miro dji. Mire jaka hi pesso o ropastar kol budenge, kai mange o djipen phares krenna.

⁹Djan tumenge, tumer lauter, kai han tchilatches! O baro Dewel shunas miro ropen.

¹⁰Awa, o baro Dewel shunas miri gole. Miro mangepen las lo an.

¹¹Ladj ap kolende, kai mange tchilatchepen kamenna! Sik te well i bari traash ap lende, te hunte nashenn le un ladjenn pen!