Read O Debleskro Drom - I Bibla an o Romano Rakepen 2021 Debleskri gili 72 Bible Online

Debleskri gili 72 - O Debleskro Drom - I Bibla an o Romano Rakepen 2021 bible

Debleskri gili 72

¹I gili o Salomestar. Mo Dewel, de tiro tchatchepen o baro rajeste an o dji, te rakrell lo o tchatchepen jaake har tu o tchatchepen rakrals.

²Kre lestar i tchatchepaskro rai, kai dell koles o tchatchepen, kones tchatcho hi, ninna te hi lo tchorwelo.

³Kote, kai job o baro rai hi, djiwenn i menshe i latcho djipen o Debleha, un tchatchepen well an o tselo them, ninna ap peskre tikne un bare berge.

⁴O baro rai mu rakrell i tchorwelenge mishto, un well ap i rig kolendar, kai tele rikedo wenn, un stakrell kolen khetne, kai len dukrenna.

⁵Muk les te djiwell[38] jaake rah har o kham un o tchon ap o bolepen hi, un jaake rah har menshe ap i phub hi!

⁶Muk les te well har o brishin, hoi perell ap i phub, har o pani, hoi krell o them sapeno.

⁷Palle djal mishto kolenge, kai an o tchatchepen tardo hi. Un i menshe djiwenn latches khetne, bis te o tchon buder gar koi hi.

⁸Un job well o baro rai pral i tsele themma, fun jek baro pani bis pash o wawar baro pani.

⁹Glan leste mukenn pen kolla tele te perell, kai an o mulo tato them djiwenna. Un kolla, kai les gar kamenna, hunte tchiwenn pen glan leste an i tchik.

¹⁰I bare raja, kai djiwenn an o foro Tarsis un an i panjeskre themma, kolla anenn leske kutch koowa. Ninna i bare raja pral i forja Saba un Seba bitchrenn leske shukar koowa.

¹¹I tsele bare raja perenn tele ap i phub glan leste. Un i tsele natsjone budrenn leske.

¹²Job hi kowa, kai shunell o tchorweles, kai dell gole, un lell les dran i bibacht win, un well ap i rig kolestar, kones kek hi, hoi leske koi hi.

¹³Kolen, kai kek soor hi un kolla, kai tchorwelo hi, ap kolende hi lo latcho un dell jak, te atchenn le djido.

¹⁴Job lell len win dran o wast kolendar, kai lenge o djipen phares kran. Un kolendar, kai len dawa dan, lell lo len krik. Lengro djipen hi leske bud moldo.

¹⁵Rah djiwell o baro rai! Denn les o sonakai dran o them Saba! Mangenn leske latchepen o Deblestar hako tsiro! Rakrenn o Debleskri bacht win pral leste hako diwes!

¹⁶An o them muk bud djob bares te well, te hi lo tardo bis pral ap i berge, jaake har o weesh ap i berga Libanon. An i forja mu wenn jaake bud menshe har o senlepen ap o them!

¹⁷Leskro lab mu atchell hako tsireske. Jaake rah har o kham ap o bolepen hi, mu well leskro lab sharedo! Lestar mu well latchepen ap i menshende an i tsele themma. Un jon te rakrenn i bacht pral leste win.

¹⁸Sharas o baro Debles, ko Debles pral o Israel. Job kokres krell baro un sorelo koowa!

¹⁹Sharas leskro baro railo lab hako tsiro! Leskro railepen mu well diklo an i tsele themma! Amen, jaake te well kowa!

²⁰Kate herenn pre o Davideskre gilja, kolentsa job o Debles an-mangas. O Davideskro dad his o Isai.