Read O Debleskro Drom - I Bibla an o Romano Rakepen 2021 Debleskri gili 73 Bible Online

Debleskri gili 73 - O Debleskro Drom - I Bibla an o Romano Rakepen 2021 bible

Debleskri gili 73

¹I gili, hoi o Asaf kras. O Dewel hi latcho ap o Israel, ap lauterende, kolen i djudjo dji hi.

²Wals sik, kai peroms o Debleskro dromestar tele. Mire herja his buder gar soreles tardo,

³har dikom, te djal i tchilatchenge jaake mishto. Me silwerom ap kolende, kai krenn pen baro.

⁴Kek duka hi len, sasto un pesso hi le.

⁵Lenge djal gar djungeles har i wawar menshenge. Jon hunte marenn pen gar tele har i wawar menshe.

⁶Doleske hi le pre-phurdo, Lengro sharepen hi har i werkli trul i meen. Un lengro tchilatcho koowa hi lengro ripen.

⁷Dran lengre djia well tchilatchepen. Un jon krenn lauter pal pengro shero.

⁸Lenge hi tchi moldo. Jon rakrenn pral lauter tchilatches. Bare labentsa rikrenn le i menshen tele.

⁹Jon krenn pengro mui pre, te tchingrenn le ap o bolepen. Un hoi le penenn, hunte well kerdo ap i phub.

¹⁰Doleske nashenn lenge leskre[39] menshe palla, un pijenn lengre laba har pani.

¹¹Jon penenna: “Har shunell nai o Dewel kawa? Har haiwell lo kowa, job, kai pral an o bolepen hi?”

¹²Jaake hi kol tchilatche. Len hi i shukar djipen. Brawleder un brawleder wenn le.

¹³His kowa tchitcheske, kai rikrom miro dji djudjo, un anom kek doosh ap mande?

¹⁴Man hi duka hako diwes, haki tsalla haiwau tire dawa.

¹⁵Te penoms me: Kamau ninna jaake te rakrell har jon, palle phukroms o Debleskre tchawen.

¹⁶Koi lom mange tsiro, te nai haiwap kawa, un phares his kowa an mire jaka,

¹⁷bis te djom an o Debleskro kheer. Kote haiwom, hoi ap lende wella:

¹⁸Tchatchepah, tu tchiwal len ap i sapeni phub, kai hunte perenn le.

¹⁹Ap jek kopo hi le buder gar koi. Lengro merepen nai wals gar djungleder!

²⁰Jon hi har i suni, hoi jek bistrell, te stell lo pre. Jaake bistreh tu len ap ko tsiro, kai hadeh tut tu, baro Dewel.

²¹Har dukas man an miro dji, un tchurje das an mire buke,

²²koi homs dinelo un haiwom tchi. Awa, dinleder har i viecho homs glan tute.

²³Kanna atchau hako tsiro pash tute. Tu rikreh man pash miro tchatcho wast.

²⁴Tu aneh man ap ko drom, hoi tut mange hi. Un pal miro djipen ap kai phub leh tu man pash tute an tiro railepen.

²⁵Te hi man tut, putchau tchi pal o bolepen, un witar gar pal i phub.

²⁶Te djal i soor peske dran mande, un miro dji buder gar sorelo hi, palle atcheh tu, miro Dewel, hako tsiro miri soor un miro brawlepen.

²⁷Koon tutar krik djal, djal tele. Un koon mukell tut, koles aneh an o mulengro them.

²⁸Mange hi mishto, te rikrap man ap miro Debleste. Te wap pash tute, miro rai, baro Dewel, kowa hi miri bacht, te rakrap halauterestar, hoi tu kral.