Read O Debleskro Drom - I Bibla an o Romano Rakepen 2021 Debleskri gili 74 Bible Online

Debleskri gili 74 - O Debleskro Drom - I Bibla an o Romano Rakepen 2021 bible

Debleskri gili 74

¹Giwede laba o Asafestar. Maro Dewel, hoske tchiwal tu men pale hako tsireske? Hoske hal tu jaake chojedo pral mende? Tu hal maro bakrengro, un mer ham tire bakre!

²Ma biste gar, te ham kol menshe, kai tu tuke glan i rah tsiro wi-rodal. Tu ginal men win dran i wasta kolendar, kai men tele rikran. Tu kamal, te was mer tiro. Ma biste i berga Zion, hoi tuke wi-rodal, te djiwess kote.

³Ab kai un dik kol barra tchiddo, hoi tiro kheer his. Halauter hi paash dino kolendar, kai hadan pen pral tute.

⁴Bari gole dan le an tiro kheer, un tchiwan kol plachte[40] pre, hoi sikrenn, te hi jon i sorleder.

⁵Mer dikam, har hadan le pengro tower, har te dans le kasht tiknes an o weesh.

⁶Ko tselo kutch koowa, hoi dran o kasht wi-tchinlo was, dan le paash. Pengro tower un o saster dan le dren.

⁷Tiro railo kheer chatchran le tele. Ko kheer, kai tu khere hals, kran le pale-tchiddo,

⁸un penan penge an pengre djia: “Kras lenge jaake, te atchell lendar buder tchi.” An o tselo them chatchran le o Debleskre khera tele.

⁹Kek sikepen hi buder kai, hoi men sikrell, te hal tu pash mende. Kek Debleskro rakepaskro hi buder kai. Un kek djinella, har rah kowa jaake atchell.

¹⁰Miro Dewel, har rah mukeh tu len pal tute te sal? Mukeh tu len hako tsiro tiro lab te praassell?

¹¹Har rah rikreh tu tut pale, un sikreh len gar tiro wast?

¹²Miro Dewel, fun tiknes pre hal miro baro rai. Tutar well, te wenn i menshe win lino dran i bibacht.

¹³Tiri bari sorjah phagal o baro pani pre, stakral i sherja kol bare panjeskre sapendar dren.

¹⁴Tu stakral i sherja ko baro viechestar Leviatan paash, un dal leskro mass i diwje viechenge te chal.

¹⁵Tu mukal pani te nashell, kai kek his. Un kote, kai sorele panja nashan, hi le kanna buder gar koi.

¹⁶Tiro hi o diwes, un tiro hi i rat. Tu dal o kham un o tchon pengro drom, kai te djan le.

¹⁷Tu penal, har baro i phub te well. I nijal un o wend kral tu.

¹⁸Kanna, baro Dewel, muk tuke an o shero te well, har praassenn tut kolla, kai hadan pen pral tute. Dik, har dinele menshe tiro lab an i tchik tserdenna.

¹⁹Mer ham har i tikno tchirklo[41]. De men gar i diwje viechen te chal! Ma biste men gar hako tsireske, men, tire menshen, kai palla lino wenn!

²⁰Biste gar koi sowel, hoi tu men dal, te rikreh tu pash mende! An o tselo them well djungelo un tchilatcho koowa kerdo an o khatepen.

²¹Ma muk kolen i ladjah penge te djal, kai palla lino hi! Kre, te sharenn i tchorwele un tikne tiro lab!

²²Ste pre, miro Dewel, un kre o tchatchepen win! Dik ko praassepen, koleha tut kol dinele hako diwes praassenna.

²³Ma biste gar koi bari gole kolendar, kai hadan pen pral tute! Shun, har diwjo jon hi! Lengri gole well bareder un bareder.