Read O Debleskro Drom - I Bibla an o Romano Rakepen 2021 Debleskri gili 76 Bible Online

Debleskri gili 76 - O Debleskro Drom - I Bibla an o Romano Rakepen 2021 bible

Debleskri gili 76

¹I gili o rajeske pral i gipangre, te giwell pash o bashepen ap i dorjengre bashepangre. O Asaf kras kai gili.

²An o them Juda prindjrell hakeno o Debles, an o tselo them Israel hi lo prindjedo.

³An o foro Jerusalem was leskro kheer kerdo, kote ap i berga Zion djiwell lo.

⁴Kote phagas job o marepaskre koola: i faile, i shilte un i chare.

⁵Tu hal raileder un bareder har i berge, hoi hako tsiro atchenna.

⁶I sorele mursha wan wi-tchoredo un meran. Un i kurepangre lan pengre mussja gar pre.

⁷Har dal tu len trad, tu, o Jakobeskro Dewel, peran i graja un kolla, kai ap lende beshdo hi, an o sopen.

⁸Glan tute kokres hunte well men daar. Koon nai atchell tardo glan tute, tu te choireh tut?

⁹Tu rakral dran o bolepen i phagi win pral i phub. Un i phub trashas un penas kek lab,

¹⁰har o Dewel pre stas, te rakrell lo o tchatchepen win, un te well lo halauterenge ap i rig, kai tikno rikedo wan ap kai phub.

¹¹Te hadenn pen chojede menshe pral tute, maro Debleste, well diklo, har baro tu hal. Un kowa, hoi pral atchell lengri choljatar, hi tuke har i shukar ripen, hoi riweh[42].

¹²Denn tumen sowel, te denn tchomone o baro Debleste, kai tumaro Dewel hi. Un rikrenn tumari sowel! Anenn leske kutch koowa, tumer dran i tsele themma, kai trul leste hi. Job hi kowa, kolestar hakeno darella.

¹³Job pandell i pralstunenge pengro baro mui, un i bare rajenge ap kai phub krell lo traash.