Read O Debleskro Drom - I Bibla an o Romano Rakepen 2021 Debleskri gili 89 Bible Online

Debleskri gili 89 - O Debleskro Drom - I Bibla an o Romano Rakepen 2021 bible

Debleskri gili 89

¹Giwede laba, hoi o Etan dran i familja Esra pre-tchinas.

²Hako tsiro kamau te giwell pral o latchepen, hoi o baro Dewel men dell. Lauterenge kamau te penell, har job pash peskre menshende rikrell.

³Kowa hi hoi me penau: Hako tsireske atchell leskro latchepen, jaake rah har dell o bolepen, rikrell job peskro lab.

⁴Job penas: “Miri sowel dom man koleste, koles me mange win rodom: Me dom miro lab miro budepaskro, o Davideste:

⁵I menshe, kai tutar wenna, hako tsireske jon atchenna. Dran tiro kheer i bare raja wenna, un hako tsiro i raja atchenna.”

⁶Baro Dewel, o bolepen sharell, hoi tu an tiri soor lauter kral, I bolepangre sharenn, har hako tsiro pash tire menshende rikral.

⁷Koon an o bolepen hi jaake har tu, maro baro Dewel? Hawo Dewel nai well jaake har maro baro Dewel?

⁸Kote, kai i bolepangre khetne wenn, o Deblestar jon darenn. Kolla lauter, kai hi trul leste, hi dareno tardo glan o baro Debleste.

⁹Tu baro Dewel un rai pral o bolepen un i phub, koon hi jaake sorelo har tu? Koon rikrell jaake pash peskre menshende har tu?

¹⁰Tu hal o rai pral o baro diwjo pani. Job te hadell pes, kreh tu, te djal lo tele.

¹¹O baro panjeskro sap Rahab[56] dal tu mulo, un kolen, kai tuke tchilatchepen kaman, tradal tu krik.

¹²O bolepen, tiro hi lo, un i phub, tiri hi li, un tu kral lauter, hoi dren hi.

¹³Ko them, kai o kham gar tardo hi, tu kral les. Ninna ko them, kai o kham pral tardo hi, tu kral les. Koi berga Tabor un i berga Hermon sharenn tut i bachtjatar.

¹⁴Tut hi i soreli mussi, tiro wast hi sorelo, un pre hadedo tiro tchatcho wast, te sikress tiri soor pral i menshende.

¹⁵O tchatchepen pral i menshende rakreh, un tchatchepaskre laba lenge peneh. Doleske atcheh tu o baro rai. An lauter, hoi kreh, dikah tiro latchepen, un har pash mende rikreh.

¹⁶Baro Dewel, har bachtelo hi kol menshe, kai sharenn tut i giljentsa, kai djiwenn an tiro latchepen!

¹⁷O tselo diwes hi le bachtelo pral tute. O tchatchepen, hoi tu len deh, krell len baro.

¹⁸Tu kokres hal lengro railepen un lengri soor, un dran tiro latchepen nai hadah mare sherja.

¹⁹Baro Dewel, tu dal men koles, kai ap mende garda della. Tu, o Dewel pral o Israel, rodal les win, te well lo maro baro rai.

²⁰Glan i rah tsiro rakral tu ap jekeste tire menshendar an i visiona un penal: “Me dom miro wast i tchatcho mursheste, te well lo ap tumari rig. Me rodom les win dran mire menshende, te well lo baro rai.

²¹Me hatsom o Davides, miro budepaskro. Me makom les miro djeteha, te well lo baro rai.

²²Miro wast rikrell les, un miri mussi krell les soreles.

²³Kek, kai ap leste djal, well o sorleder pral leste, un kek tchilatcho nai hadell pes pral leste.

²⁴Me kamau kolen khetne te stakrell, kai ap leste djan, un kolen, kai leske tchilatchepen kamenn, dau me an i phub.

²⁵Hako tsiro rikrau pash leste, un hom leske latcho. Me krau les bareder har kolla, kai trul leste hi.

²⁶Me dau les penepaske pral ko tselo them mank o baro pani[57] un o lengsto pani Eufrat.

²⁷Job penell ap mande: Tu hal miro dad, miro Dewel, kowa, kai rikrell peskre wasta pral mande un well ap miri rig.

²⁸Un me krau, te well lo miro phureder tchawo, un o pralstuno pral i bare rajende ap kai phub.

²⁹Hako tsiro atchell miro latchepen ap leste, un miro lab, hoi leske sowel dom, rikrau me.

³⁰Hako tsiro well jek leskre tchawendar, kai pal leste wenna, o baro rai pral o them, jaake rah har o bolepen koi hi.

³¹Leskre tchawe, te mukenn le miro drom, un djan gar pal miro tchatchepen,

³²un krenn gar, hoi lendar kamau, un rikrenn pen gar ap mire laba,

³³palle dau len dawa lengri doshake, un duka lengro tchilatchepaske.

³⁴Miro latchepen lau lendar gar krik, un miro lab, hoi len dom, phagau me gar.

³⁵Koi sowel, hoi lenge dom, phagau gar. Un kol laba, hoi dran miro mui djan, krau me gar wawartchandes.

³⁶Jek kopo dom me man sowel, un chochau o Davides gar: Jaake har tchatcho hi, kai hom o Dewel, jaake hi tchatcho,

³⁷te wenn o Davidestar bare raja an hake tsirja, jaake rah har o kham koi hi,

³⁸un o tchon ap o bolepen tardo hi, un dikell, hoi ap kai phub djala.”

³⁹Kanna, baro Dewel, tchiwal tu les pale, koles tu win rodal, te was lo baro rai, Tu mukal les te perell, un hal chojedo ap leste.

⁴⁰Tu phagal tiri sowel, hoi tiro budepaskres dal. Leskri rajeskri stadi witsral ap i phub, an i tchik.

⁴¹Leskro foro kral tu paash, un kol bare sorele khera dal an kotja paash.

⁴²Lauter, kai ap o drom djan un les dikan, tchoran les win. Kolla, kai langs leste djiwenn, san pal leste.

⁴³Kolla, kai ap leste djan, mukal, te hadenn le pen. Un kral kolen bachtelo, kai leske tchilatchepen kamenn.

⁴⁴An o kurepen his leskro charo buder gar sorelo. Un tu mukal o Davides gar o sorleder te well.

⁴⁵Tu lal lestar o railepen, un leskri raili beshepaskri stakral an i phub.

⁴⁶Glan o tsiro mukal tu les phuro te well, un anal ladj ap leste.

⁴⁷Baro Dewel, har rah kameh tut gomme te khatrell? Har rah mukeh tiri choli te chatchrell har i jag?

⁴⁸Tu djineh, har tikno miro djipen hi. Ma biste, har sik i mensho buder gar kai hi! Tu kokres kral les jaake.

⁴⁹Kek mensho hi koi, kai hunte merell gar. Kek nai lell peskro djipen win dran o merepen.

⁵⁰Baro Dewel, glan i rah tsiro dal tu men tiro lab, te tchiwess tiro latchepen ap mende. Hoske rikreh tu gar koi sowel, hoi dal o Davideste?

⁵¹Ma biste koi ladj, hoi hi ap mande, tiro budepaskro! Dik, har hidjrau ko tselo praassepen kolendar, kai tut gar prindjrenna.

⁵²Baro Dewel, kolla, kai tut gar kamenna, praassenn man, o baro rajes, koles tu tuke win rodal.

⁵³Sharedo well o baro Dewel hako tsireske. Amen. Awa! Amen.