Read O Debleskro Drom - I Bibla an o Romano Rakepen 2021 Debleskri gili 9 Bible Online

Debleskri gili 9 - O Debleskro Drom - I Bibla an o Romano Rakepen 2021 bible

Debleskri gili 9

¹I gili o rajeske pral i gipangre, te giwell har koi gili ‘Muth labben’[7]. O David kras kai gili.

²Baro Dewel, me parkrau man pash tute o tselo djijeha, un rakrau pral ko tselo baro koowa, hoi tu kral.

³Pral tute hom bachtelo, un miro dji giwell tutar, un sharau tiro lab, tu Dewel pral halauter!

⁴Glan tute hunte tserdan pen kolla pale, kai his chojedo ap mande. Jon peran un meran glan tute.

⁵Awa, tu lal miro koowa an tiro wast, un beshal tut ap tiro tchatchepaskro stamin un dal man tchatches. Tu hal i tchatchepaskro rai, kai an o tchatchepen tardo hi.

⁶Tu dal trad kol menshen an wawar themma, un maral kolen, kai kaman tutar tchi te djinell. Lengre laba hi bistedo kanna un hako tsireske.

⁷Awa, kolla, kai kaman tut gar, hi buder gar koi. Krik hi le hako tsireske. Lengre forja kral tu paash. Hako tsireske hi le bistedo.

⁸O baro Dewel atchella hako tsireske. Leskro tchatchepaskro stamin hi tardo.

⁹Job hi o tchatchepaskro rai pral i tseli phub. Un pral i tsele themma rakrell job o tchatchepen win.

¹⁰I bibachtele nai khatrenn pen pash leste, un job rikrell peskro wast pral lende, un dell jak ap lende an phare tsirja.

¹¹Doleske rikrenn kolla ap tute, kai tiro lab prindjrenna. Koon tut, o baro Debles, rodella, koles mukeh tu gar kokres.

¹²Giwenn o baro Debleske, kai ap i berga Zion khere hi! Penenn i menshenge an wawar themma, hoi job lauter kras!

¹³Kowa, kai bistrell gar te dell lo kolen i phagi, kai lan i rateskri doosh ap pende. Job shunell i gole un o mangepen kolendar, kai tchorwelo un palla lino hi.

¹⁴Ab latches ap mande, baro Dewel! Dik o tchilatchepen, hoi kolla mantsa krenna, kai hi mulo chojedo ap mande! Un tserde tu man win dran o merepaskro wast!

¹⁵Palle djau an i wudja tiro forestar Zion dren, un rakrau lauterentsa pral ko latchepen, hoi tu ap mande kral, un sharau tut i bachtelo djijeha, kai tu man dran i bibacht win lal.

¹⁶I menshe an wawar themma, peran an koi cheb, hoi jon i win hadan. An koi netsa, hoi jon win tchiwan, tapran le pen kokres.

¹⁷O baro Dewel sikras, koon job hi, un das i tchilatchende pengri phagi. I tchilatche pandan pen an koi netsa, hoi jon pengre wastentsa kran.

¹⁸Kamau, te djan le lauter pash i mulende, — kalla, kai kamenn o Deblestar tchi te djinell, un bistrenn, kai hi job o Dewel.

¹⁹O Dewel bistrell o tchorweles gar — an kek tsiro. I bibachtele nai djinenn, te well i tsiro, kai wenn le bachtelo.

²⁰Baro Dewel, ste pre! Muk i menshen gar te hadenn le pen pral tute! An i menshen dran i tsele themma glan tute! Un rake o tchatchepen pral lende win!

²¹Tchip i daar ap lende, baro Dewel, un sike lende, te hi le tchi har menshe!