Read O Debleskro Drom - I Bibla an o Romano Rakepen 2021 Debleskri gili 91 Bible Online

Debleskri gili 91 - O Debleskro Drom - I Bibla an o Romano Rakepen 2021 bible

Debleskri gili 91

¹Kowa, kai beshell tel o wast o Deblestar, ko pralstunestar, un atchell pash leste, ko sorelo Debleste,

²kowa penell ap o baro Debleste: “Pash tute hom khere. Tu hal mange har i baro sorelo kheer, miro Dewel, ap tute dikau.”

³O baro Dewel dell jak ap tute, te peress gar an i dorja, hoi tchiwell kowa tuke, kai kamell tut te taprell. Ninna lell o Dewel tiro djipen win dran o nasslepen, hoi anell an o merepen.

⁴Har i kachni peskre ternen tel leskre mussja khatrell, jaake khatrell o Dewel tut tel leskre sorele mussja. Kote nai djal tuke tchi. Job rikrell tut jaake har lo penas. Doleske nai well kek tchilatchepen ap tute.

⁵Tu hunte tapress kek daar glan kowa, hoi rati nai wella, witar gar glan kol kashta, hoi ap o diwes karje dino wenna,

⁶witar gar glan ko nasslepen, hoi tchorchanes an i rat well, witar gar glan ko tchilatchepen, hoi ap o diwes marell.

⁷Ninna te perenn i serja menshe ap tiri rig, un deesh serja ap tiri tchatchi rig, tuke djal tchi.

⁸Awa, tire jakentsa dikeh tu les. Tu dikeh har i tchilatche lenn pal kowa, hoi jon kran.

⁹Tu penal: “Pash o baro Debleste hom khere.” Tu khatral tut pash o Debleste, ko pralstuneste.

¹⁰Doleske well kek bibacht ap tute, un kek nasslepen nai well an tiro kheer.

¹¹Job kokres penas ap peskre bolepangre, te denn le jak ap tute ap tire tsele dromma,

¹²te hidjrenn le tut ap pengre wasta, jaake te nai dukress tiri heri ap kek bar.

¹³I lewe un i sapa nai dukrenn tut gar. Tu stakreh len lauter khetne.

¹⁴O Dewel penell: “Job kamell man o tselo djijestar. Doleske lau les dran kowa lauter win. Job prindjrell man. Doleske dau jak ap leste.

¹⁵Job dell ap mande gole. Doleske shunau me ap leste, un hom pash leste, te djal leske gar mishto. Me lau les win dran i bibacht un krau les bares.

¹⁶Me dau les i lengsto djipen un sikrau les, te hom kowa, kai les win lell dran i bibacht.”