Read O Debleskro Drom - I Bibla an o Romano Rakepen 2021 Debleskri gili 95 Bible Online

Debleskri gili 95 - O Debleskro Drom - I Bibla an o Romano Rakepen 2021 bible

Debleskri gili 95

¹Awenn, te giwenn gilja o baro Debleske! Denn gole i bachtjatar glan leste! Job hi maro rikepaskro, kai menge lauter mishto krella.

²Awenn glan leste, te parkras men pash leste, te giwas leske gilja un sharas les!

³O baro Dewel hi o pralstuno Dewel, o baro rai pral i tsele debla[58].

⁴An leskro wast hi o telstunepen i phubjatar, un i bareder berge hi ninna leskre.

⁵Leskro hi o baro pani. Job kras les. Ninna o them, job kras les leskre wastentsa.

⁶Awenn, mangas les an! Te djas ap mare tchanga, un peras tele glan o baro Debleste! Job hi kowa, kai kras men.

⁷Job hi maro Dewel, un mer ham leskre menshe. Job dell jak ap mende har i bakrengro dell jak ap peskre bakre, un anell len kote, kai hi len doha te chal. Kau diwes rakrell job ap tumende. Shunenn ap leskre laba:

⁸Ma pandenn tumare djia, har tumare phure kran ap i platsa Meriba un Massa[59] an o mulo tato them.

⁹Fothe dikan le lauter, hoi lenge krom, patsan le gar, te hom me, o Dewel, mank lende, un nai dau len lauter, hoi len hunte well djipaske.

¹⁰Star-deesh bersha was mange djungeles, te dikom ap kol menshende, un penom: “Kalla hi menshe, kai peran ap pengre sherja un djinenn gar, hoi tchatcho hi. Ap miro drom kamenn le gar te djal.”

¹¹Doleske dom man sowel an miri choli: “Jon te djan gar dren an miro them, kai nai wans le khere!”