Read O Debleskro Drom - I Bibla an o Romano Rakepen 2021 Gosewe laba 1 Bible Online

Gosewe laba 1 - O Debleskro Drom - I Bibla an o Romano Rakepen 2021 bible

Gosewe laba 1

¹An kau liil hi i gosewe laba o Davideskro tchawestar, o Salomestar. Job his i baro rai pral o Israel.

²Kal laba sikrenn mende, hoi tchatcho goswepen hi, te nai haiwas, hoi men dureder anell, un hoi gosewo rakepen kamell te penell.

³Kol laba sikrenn mende, har te djiwas mishto un tchatcho, har te djiwas i djipen kek chochepah, un har te djas ap o tchatcho drom.

⁴Jaake wenn ninna kolla gosewo, kolen tchi an o shero hi. Un terne mursha haiwenn, hoi hunte krenn le, un dikenn dren, hoi mishto hi.

⁵Kolla, kai gosewo hi, shunenn, har te wenn le gomme gosweder. Kolla, kai siklo hi, hatsenn, har te djan le pengro drom.

⁶Jon nai haiwenn gosewe laba, un rakepen, kai o tchatchepen dren khatedo hi, awa, laba, kai gosewe menshe penan, un sawe, kai hunte rodess, hoi jon kamenn te penell.

⁷Glan halauter hunte djiwess o baro Debleha, te kameh gosewo te well. Koneske o goswepen tchi moldo hi, un koon kamell tchi te djinell, hi dinelo.

⁸Miro tchawo, shun ap i laba, hoi tiro dad tuke penell! De jak ap kowa, hoi tiri dai tutar kamell!

⁹Kowa hi tuke har i shukar stadi ap tiro shero, har i werkli trul tiri meen.

¹⁰I tchilatche, te penenn le: ‘Dik, hoi krah!’ Palle dja gar koi!

¹¹Jon nai penans: “Am mentsa! Mer lurah jekes pre un marah les. Mer nai hatsams sawen, kai kek tchilatchepen an lengro shero hi. Kolen lah palla, te well men tchomone sapaske.

¹²Mashkral dran lengro djipen las len win, un bitchras len tele pash i mulende an o mulengro them!

¹³Tchoras kutch koowa menge, te kras mare khera pherdo kolestar.

¹⁴Ab mentsa! Hakeno mendar lell jaake bud har ko wawar.”

¹⁵Miro tchawo, ma dja lentsa ap lengro drom! Rike tut krik lendar!

¹⁶Jon denn an i herja, te krenn le tchilatchepen. Sik nashenn le, te marenn le menshen.

¹⁷Tchitcheske well i netsa glan i tchirkle pre-pandlo. Jon dikenn lat un djan gar dren.

¹⁸Hi gar jaake kal murshentsa: Jon kamenn i wawaren te marell, un haiwenn gar, te perenn le kokres an pengri netsa.

¹⁹Jaake djal hakeneske, kai kamell o wawareskro brawlepen te lell. Sawo mensho lell peske kokres o djipen.

²⁰O goswepen hi har i dai, kai kharell ap i dromma, un dell gole ap i forjengre platse.

²¹Joi mukell pes glan i bare wudja an o foro te shunell, un kote, kai bud menshe khetne wenn:

²²Tumer, kolen tchi an o shero hi: Har rah kamenn tumer dinelo koowa te krell? Tumer sapangre, har rah kamenn tumer pral o wawareste te sal un les praassell? Tumer dinele, har rah penenn: Mer kamah gar te djinell, hoi tchatcho hi?

²³Te shunans ap mande, har dom tumen trad, sikroms tumende, hoi an miro dji hi, un mukoms tumen mire laba te haiwell.

²⁴Har kharom tumen, kaman gar te shunell. Har hadom miro wast, dan tumer gar jak.

²⁵Tumer mukan tumen tchi te penell, un dan gar jak ap kowa, hoi penom.

²⁶Jaake kamau me ninna te sal, te well i bibacht pral tumende, awa, me sau, te well kowa, hoi darenna,

²⁷un well pral tumende har i sorelo baro ducho; te well i bibacht pral tumende har i phurdepen, hoi lauter khetne phagell; te well i pharo tsiro un bari daar pral tumende.

²⁸Palle denn le pal mande gole, un me mukau tchi mandar te shunell. Palle rodenn le man un hatsenn man gar.

²⁹Jon kaman o tchatchepen gar te djinell, un gar o baro Debleha te djiwell.

³⁰Har penom lenge, hoi lenge latcho hi, kran le kowa gar. Har dom len trad, dikan le krik.

³¹Doleske hunte chan le, hoi ap lengre dromma bares was. un wenn tchalo kolestar, hoi an lengre sherja trujel djas.

³²Kolen tchi an o shero hi, kolla rissrenn o Debleske o dumo; un kowa anell lenge o merepen. Un lengro pre-phurdepen marell len.

³³Koon ap mande shunell, nai djiwell kek darjah, un leskro dji hunte darell kek bibacht.