Read O Debleskro Drom - I Bibla an o Romano Rakepen 2021 Gosewe laba 10 Bible Online

Gosewe laba 10 - O Debleskro Drom - I Bibla an o Romano Rakepen 2021 bible

Gosewe laba 10

¹Kalla hi i gosewe laba o Salomestar. I gosewo tchawo krell peskro dades un peskri dat bachtelo. I dinelo tchawo krell, te well lenge ropaske.

²Tchoredo brawlepen hi tchitcheske. O tchatchepen lell tut dran o merepen win.

³O baro Dewel mukell i latches gar te bokell. Krik pestar tradell lo ko tchilatches, koles bok pral bud koowa hi.

⁴Koon peskre wasta an i gali tchiddo mukell, kowa well tchorwelo. Koon bud budrell, kowa well brawelo.

⁵Koon nijaleske peskro djob dren anell, hi i gosewo tchawo. Koon sowell an ko tsiro, kai o djob dren anlo well, kowa hi i tchawo, koleske peskro dad pes hunte ladjell.

⁶O Debleskri bacht hi tchiddo ap koleste, kai an o tchatchepen tardo hi. An o rakepen i tchilatchendar hi lengro djungelo koowa khatedo.

⁷Latche menshe wenn gar bistedo. Kowa, hoi le kran, hi o Debleskro latchepen. I tchilatche wenn bistedo.

⁸Koles, kai i gosewo dji hi, rikrell pes ap kol laba, hoi leske penlo wan. jek, kai dinelo koowa rakrell, nashrell halauter.

⁹Kowa, kai an o tchatchepen djiwell, hunte darell gar. Kowa, kai ap bange dromma djal, well tapedo.

¹⁰Kowa, kai i jakentsa dell, dukrell i wawaren. Kowa, kai dinelo koowa rakrell, nashrell halauter.

¹¹Har i brunna dran kolate djido pani nashell, jaake hi i laba kolestar, kai an o tchatchepen tardo hi. Pal i laba i tchilatchendar hi lengro djungelo koowa khatedo.

¹²Dran choli well tchingepen. Koon o wawares o djijestar kamell, bistrell leskro tselo tchilatcho koowa.

¹³Kowa, kai haiwell, hoi mishto un gar mishto hi, rakrell gosewe laba. Koles, kai tchi an o shero hi, kowa lell dawa.

¹⁴Gosewe menshe rodenn pal kowa, te djinenn le bud koowa. O rakepen i dinelestar anell sik an i bibacht.

¹⁵O brawlepen i brawelestar hi leske har i sorelo kheer. I bibacht o tchorwelestar hi leskro tchorwlepen.

¹⁶I budi kolestar, kai an o tchatchepen tardo hi, anell leske doha djipaske. I chocheno kras peskro brawlepah tchilatcho koowa.

¹⁷Kowa, kai shunell ap koleste, kai dell les trad, kowa djal ap o drom, hoi anell o djipen. Kowa, kai kamell gar te shunell, hi ap i drom, kai djal lo nashedo.

¹⁸Koles hi i chocheno mui, kai peskri choli ap i wawareste khatrell. Un kowa, kai chochepen pral i wawareste rakrell, hi i dinelo.

¹⁹Koon bud laba krell, anell ninna doosh ap peste. Koon peskro mui rikrell, hi gosewo.

²⁰O rakepen kolestar, kai an o tchatchepen tardo hi, hi har kutch rup. Kowa, hoi i tchilatches an o shero hi, hi tchi moldo.

²¹O rakepen kolestar, kai an o tchatchepen tardo hi, dell bud menshen newi soor. Kolen tchi an o shero hi, kolla merenn dran ko dinelo koowa, hoi le kran.

²²Te tchiwell o baro Dewel peskri bacht ap tute, weh tu brawelo. Un kowa, hoi tu koi pashel kreh, hi tchitcheske.

²³O dineleske hi shukar, te krell lo wi-ladjedo koowa. O gosewo mursheske hi shukar, te haiwell lo gomme budeder.

²⁴Kolestar i tchilatcho darell, kowa well pral leste. Un kowa, hoi i latche mangenna, kowa well lenge dino.

²⁵Har i sorelo ducho pral i phub phurdas, his o tchilatcho buder gar koi. Kowa, kai an o tchatchepen tardo hi, atchell hako tsireske.

²⁶Har shut i dandenge, un jagakro ducho i jakenge, jaake hi o tchi-moldo, kai kamell gar te budrell, kolenge, kai les ap i budi bitchran.

²⁷Kowa, kai djiwell o baro Debleha, djiwell bud bersha. O djipen o tchilatchestar well tikneder.

²⁸Kowa, kai i latche pre dikenna, te well len, kowa well lenge dino; un jon wenn bachtelo. Kowa, kai i tchilatche pre dikenn, te well len, kowa well gar.

²⁹O drom o baro Deblestar hi har i sorelo kheer kolenge, kai an o tchatchepen tardo hi. I tchilatchen anell lo an o merepen.

³⁰Kowa, kai an o tchatchepen tardo hi, atchell hako tsiro soreles tardo. I tchilatche atchenn gar an o them.

³¹Dran o mui kolestar, kai an o tchatchepen tardo hi, wenn gosewe laba. I chocheni tchip well tele tchinlo.

³²O rakepen kolestar, kai an o tchatchepen tardo hi, krell bachtelo. O rakepen i tchilatchendar dukrell.