Read O Debleskro Drom - I Bibla an o Romano Rakepen 2021 Gosewe laba 11 Bible Online

Gosewe laba 11 - O Debleskro Drom - I Bibla an o Romano Rakepen 2021 bible

Gosewe laba 11

¹I waga, hoi sikrell gar tchatches, har pharo tchomone hi, hi i djungelo koowa glan o baro Debleskre jaka. Job hi bachtelo pral koleste, kai plaissrell pal o tchatcho pharepen.

²I pre-phurdo dji well sik an i ladj. I dji, hoi hadell pes gar, hi gosewo.

³Lengro djudjo dji anell i latchen ap o tchatcho drom. Ko midjak koowa, hoi i phukepangre krenn, well ap lende pale un phagell len.

⁴O brawlepen hi i brawelenge tchi moldo ap ko diwes, kai o Debleskri choli pral i menshende well. Kol menshe, kai an o tchatchepen tardo hi, wenn win lino dran o merepen.

⁵Ko tchatcho koowa, hoi o Debleskre menshe krenna, krell lengre dromma tchatcho. Ko tchilatcho nashrell pes an peskro tchilatcho koowa.

⁶Ko tchatcho koowa, hoi o Debleskre menshe krenna, lell len win dran o merepen. I phukepangre wenn tapedo an pengri bok pal i lowe.

⁷Ap ko diwes, kai merell o tchilatcho, merell ninna kowa, kai lo peskro dji pre tchiwas. Kowa, hoi leske bud moldo his, hi tchitcheske.

⁸Kowa, kai an o tchatchepen tardo hi, well win lino dran i bibacht. Un pal leste well ko tchilatcho koi dren.

⁹Jek, kai kamell tchi o Deblestar te djinell, anell peskro rakepah i wawaren o Debleskro dromestar tele. Kolla, kai an o tchatchepen tardo hi, lenn pengro gosewo rakepah wawaren dran o merepen win.

¹⁰Te djal i latchenge mishto, palle hi i menshe an o tselo foro bachtelo. I tchilatche, te merenn le, denn le an o foro gole i bachtjatar.

¹¹O Debleskre menshe anenn o Debleskri bacht pral o foro. Un o foro well sorelo. Dran o mui i tchilatchendar well sau rakepen, hoi phagell o foro tele.

¹²Koon praassell o wawares, hi narwelo. I gosewo mursh rikrell peskro mui.

¹³Kowa, kai djungelo koowa pral i wawarende rakrell, phukrell, hoi lo tchorchanes shunas. I mursh o labestar rikrell kowa peske.

¹⁴Kote, kai kek an o them hi, kai i menshenge o drom sikrell, djan le tele. Kote, kai bud penenn, har nai dureder djal, djal i menshenge mishto.

¹⁵Kowa, kai peskro dadeskro wast das, te plaissrell lo i wawareskri sijaan, koles khaitell kowa, hoi lo kras. Koon kowa gar kamell te krell, koleske djal feteder.

¹⁶I kamli djuwel well sharedo. Un i mursh, kai haiwell pes te kurell[4], well brawelo.

¹⁷Kowa, kai latcho ap o wawareste hi, krell peske kokres mishto. Kowa, kai o wawares dukrell, dukrell pes kokres.

¹⁸I tchilatcho mensho lell peske sau koowa khetne, hoi leske gar atchell. Koon an o tchatchepen peskri budi krell, lell i plaissepen, hoi atchell.

¹⁹Te kreh o tchatchepen, hal ap o drom an o djipen. Te nasheh o tchilatchepen palla, djah ap o drom an o merepen.

²⁰O baro Dewel dikell chojedes ap kolende, kolen dui djia hi. Latches dikell lo ap kolende, kai o tchatcho drom djan.

²¹Tu nai deh tiro wast koi pre: O tchilatcho lell peskri phagi. Kolla, kai an o tchatchepen tardo hi, wenn win lino dran o merepen.

²²I shukar djuwel, kai djinell gar, hoi tchatcho hi, hi har i sonakaskri gustri an o nak i balestar.

²³Kowa, hoi kolla kamenn, kai o tchatchepen krenn, anell lenge latchepen. Un kowa, hoi i tchilatche kamenn, anell lenge o Debleskri choli.

²⁴Kote hi jek, kowa dell un dell; un job lell budeder un budeder. Un kote hi i wawar, kowa hi tchinlo un dell tchi; un well tchorwleder.

²⁵Kones i baro dji i wawarenge hi, koleske well jaake bud dino, te well lo budeder har tchalo. Un kowa, kai i trusheles pani dell, koles well ninna pani dino.

²⁶Kowa, kai djob pale rikrell, pral koleste rakrenn le bibacht win. Un bacht rakrenn le win pral koleste, kai djob bikrell.

²⁷Kowa, kai kamell o tselo djijeha o latchepen te krell, ap koleste dikenn le latches. Kowa, kai o tchilatchepen rodell, ap koleste well kowa.

²⁸Kowa, kai tchiwell peskro dji ap peskro brawlepen, merell tele har patria. Kolenge, kai krenn o tchatchepen, djal mishto har i senelo ruk.

²⁹Kowa, kai gar jak dell ap peskro kheer un ap peskri familja, pral koleste well i phurdepen, hoi lauter krik phurdell. Un ko dinelo well palle o budepaskro kolestar, koles i gosewo dji hi.

³⁰Kowa, hoi i latcho un tchatcho mensho krell, hi har i ruk, hoi o djipen dell. Ko mensho, kai gosewo hi, tserdell wawar menshen ap peskri rig.

³¹Djiness, i latcho mensheske ap kai phub well o latchepen pale dino, hoi lo kras. Har bud budeder well palle o tchilatchepen pale dino kolenge, kai o tchilatchepen kran un o Debleskro drom mukan.