Read O Debleskro Drom - I Bibla an o Romano Rakepen 2021 Gosewe laba 12 Bible Online

Gosewe laba 12 - O Debleskro Drom - I Bibla an o Romano Rakepen 2021 bible

Gosewe laba 12

¹Koleske, kai kamell gosewo te well, hi shukar, te well leske penlo, hoi lo gar mishtes kras. Kowa, kai mukell pes tchi te penell, atchell dinelo.

²Ap i latcho mensheste dikell o baro Dewel latches. Pral koleste, koles o tchilatchepen glan hi, rakrell lo i phagi win.

³O tchilatchepen dell kekes i soor, te atchell lo soreles tardo. Kowa, kai an o tchatchepen hi, atchell soreles tardo har i ruk bare drabentsa[5].

⁴I romni, kai peskri budi mishto krell, hi peskro romeske har shereskro sonakai. I romni, kai anell ladj ap peskro romeste, hi har i djungelo nasslepen an leskre kokale.

⁵O Debleskre menshe kamenn o tchatchepen te krell. Tchilatche menshen hi tchi an o shero har chochepen.

⁶I tchilatchengre laba kamenn jekes an o merepen te anell. O rakepen kolendar, kai o tchatcho drom djan, lell len dran o merepen win.

⁷I tchilatche wenn tele witsedo un hi gar buder koi. O kheer kolendar, kai an o tchatchepen tardo hi, atchell tardo.

⁸Kones gosewo koowa an o shero hi, kowa well sharedo. Kones dinelo koowa an o shero hi, ap koleste dikenn le tele.

⁹Hi feteder, te hi jek tchorwelo un hunte djal ap i budi, har te krell pes jek bares un les hi gar doha chapaske.

¹⁰Kowa, kai an o tchatchepen tardo hi, les hi i dji peskre viechenge. I tchilatchen hi kek dji lenge.

¹¹Koon ap peskro kotar phub budrell, koleske well bud maro. Koon sawo koowa pal nashell, hoi tchi moldo hi, kowa hi narwelo.

¹²Tchilatche menshenge hi shukar, te krenn le midjak koowa. Kolla, kai an o tchatchepen tardo hi, hi soreles tardo un krenn latcho koowa.

¹³O tchilatcho taprell pes kokres an peskre chochene laba. Kolla, kai an o tchatchepen tardo hi, wenn win dran i bibacht.

¹⁴Koon latchepen rakrella, djiwell ninna latches. I mensho lell pale, hoi lo peskre wastentsa krell.

¹⁵O drom, kai o dinelo djal, hi an leskre jaka tchatcho. I gosewo mensho shunell ap kowa, hoi wawar leske penenn, te krell lo.

¹⁶Koon peskri choli sik sikrell, hi dinelo. Koon krell, har te shunals lo o praassepen gar, kowa hi gosewo.

¹⁷I mursh o labestar rakrell o tchatchepen win. I chocheno, kai dell glan, te penell lo, hoi lo dikas un shunas, anell chochepen pre.

¹⁸Laba, hoi sik win rakedo wenna, nai denn tchurje har i charo. O rakepen i gosewe menshendar anell sastepen.

¹⁹O tchatcho rakepen atchell hako tsireske. Chochene laba rikrenn gar rah.

²⁰Chochepen hi an i djia kolendar, kai tchilatcho koowa win krenn. Kolla, kai jaake rakrenn, te well kek tchingepen pre, wenn bachtelo.

²¹Kek tchilatcho koowa well ap kolende, kai an o tchatchepen tardo hi. Ap i tchilatchende well bud bibacht.

²²O baro Dewel dikell chojedes ap kolende, kai chochenna. Latches dikell job ap kolende, kai krenn o tchatchepen.

²³Jek, kai gosewo hi, sikrell gar, har bud job djinell. I dinele denn pengro dinlepen win gole.

²⁴Koon bud budrell, well o rai pral wawar. Koon peskre wasta an i gali tchiddo mukell, well i budepaskro, un hunte budrell tel dawa.

²⁵I pharo dji tserdell i menshes tele. I latcho lab krell les bachtelo.

²⁶Kowa, kai an o tchatchepen tardo hi, hatsell peskro drom. I tchilatchen anell pengro drom kote, kai djan le nashedo.

²⁷Koon peskre wasta an i gali tchiddo mukell, hatsell tchi, hoi job nai chals. Koles, kai bud budrell, hi bud chapaske.

²⁸O djipen hi kote, kai djan le ap o tchatcho drom. Kau drom hi mishto kerdo un anell gar an o merepen.