Read O Debleskro Drom - I Bibla an o Romano Rakepen 2021 Gosewe laba 13 Bible Online

Gosewe laba 13 - O Debleskro Drom - I Bibla an o Romano Rakepen 2021 bible

Gosewe laba 13

¹I gosewo tchawo shunell ap peskro dadeste, te penell job leske, hoi lo gar mishto kras. I pre-phurdo sal un shunell ninna gar, te well lo trad dino.

²I latcho mensho djiwell ko latchepastar, hoi dran leskre laba wella. I phukepangre bokenna pal o kurepen.

³Kowa kai ap peskro rakepen jak dell, kowa dell jak ap peskro djipen. Koles i baro mui hi, kowa tserdell bibacht ap peste.

⁴Kowa, hoi jek kamell, kai kamell gar te budrell, well les gar. Kolenge, kai bud budrenn, hi doha koi.

⁵O chocheno rakepen hi djungeles glan i jaka kolestar, kai an o tchatchepen tardo hi. O tchilatcho krell praassedo koowa un wi-ladjedo koowa.

⁶Lengro tchatcho koowa anell kolen dran i bibacht win, kai kek doosh ap lende hi. I doosh i tchilatchendar anell len an i bibacht.

⁷Kote hi jek, kai krell, har te wals lo brawelo. Un les hi tchi. Un kote hi jek, kai krell, har te wals lo tchorwelo. Un les hi bud brawlepen.

⁸I brawelo nai ginell peskro djipen win. I tchorweleste dell kek trad. Pash leste hi tchi te lell.

⁹Koon an o tchatchepen tardo hi, hi har i momeli, hoi bachteles chatchell, un i tchilatcho har i momeli, hoi djal win.

¹⁰Mank i pre-phurde hi hako tsiro tchingepen. Te hal gosewo, mukeh tuke tchomone te penell.

¹¹O brawlepen, hoi sik khetne lino was, djal ninna sik pale krik. Kowa, kai anell lokes peskre lowe khetne, lell budeder un budeder.

¹²Te dikell jek i rah tsiro ap tchomone, un kowa well gar, well leskro dji pharo. Te well kowa, ap hoi jek jaake rah dikas, palle djiwell leskro dji pale pre.

¹³Koleske, kai i latcho lab i herjentsa stakrell, djal djungeles. Koleske, kai rikrell pes ap ko lab, djal mishto.

¹⁴I laba, hoi i gosewo rakrell, hi har djipaskro pani, un sikrenn hawo drom jek hunte djal, te perell lo gar an o merepaskre shelle.

¹⁵Kol menshe, kai haiwenn, hoi hunte kerdo well, hatsenn mala. I phukepangre djan i drom, kai anell len an i bibacht.

¹⁶Hakeno, kai gosewo hi, krell tchi, te rakras lo gar peskro djijeha pral kowa. I dinelo mensho dell peskro narwlepen win gole.

¹⁷I tchilatcho bitchepaskro anell bibacht. I bitchepaskro o labestar rakrell jaake, te well lauter pale mishto.

¹⁸An tchorwlepen un ladj well kowa, kai mukell pes tchi te penell. An-diklo well kowa, kai shunell, te well lo trad dino.

¹⁹Te well kowa, hoi jek jaake rah kamas, hi lo bachtelo. I dinele choirenn pen, te hunte mukenn le pengro tchilatcho drom.

²⁰Kowa, kai khetne hi kolentsa, kai gosewo hi, kowa well ninna gosewo. Kowa kai i maal hi i dinelentsa, kowa well bibachtelo.

²¹Kolla, kai o Debleskro dromestar tele djan, kolen lell i bibacht palla un taprell len. Kolla, kai an o tchatchepen tardo hi, lenn latcho koowa.

²²Kowa, hoi i latcho mursh pale mukell, well dureder dino leskre tchawende un tchawengre tchawende. O brawlepen kolestar, kai an o tchilatchepen djiwas, lell kowa, kai an o tchatchepen tardo hi.

²³Bud djob well bares ap i phub i tchorwelenge. Lengro tchatchepen lenn le gar, un bud merenn i bokatar.

²⁴I dad, kai peskro tchaweste kek phagi dell, krell leske gar mishto. Koon les kamell o djijestar, kowa rikrell pes gar pale, te dell lo les i phagi.

²⁵Koles, kai an o tchatchepen tardo hi, hi doha chapaske. O per i tchilatchestar bokella.