Read O Debleskro Drom - I Bibla an o Romano Rakepen 2021 Gosewe laba 14 Bible Online

Gosewe laba 14 - O Debleskro Drom - I Bibla an o Romano Rakepen 2021 bible

Gosewe laba 14

¹I gosewi djuwel krell, te well lakro kheer soreles tardo. I dineli djuwel phagell les peskre wastentsa tele.

²Kowa, kai kamell o baro Debleha te djiwell, djal o tchatcho drom. Koon tchi lestar kamell te djinell, djal ap bange dromma.

³O rakepen o dinelestar sikrell peskro pre-phurdepen. I laba i gosewendar hi har wasta trul leste, hoi rikrenn len.

⁴Kote, kai kek grumja hi, well kek djob dren anlo. I sorjah i grumjendar aneh bud djob dren.

⁵Te penell i mursh o labestar, hoi lo dikas un shunas, rakrell lo o tchatchepen. Te penell i chocheno, hoi lo dikas un shunas, anell lo chochepen pre.

⁶I pre-phurdo, te rodell lo o goswepen, hatsell lo les gar. Kowa, kai peskro djijeha rakrell, koleske hi gar phares tchomone dren te dikell.

⁷Ma dja khetne i narweleha! Tu shuneh lestar tchi wawar har dinelo koowa.

⁸O gosewo dell jak har lo djiwell, doleske hi lo gosewo. I narwele perenn hako kopo ap dinlepen dren. Un jaake chochenn le pen kokres.

⁹I dinele sanenn pral i doosh, hoi jon ap pende anan. O Dewel dikell latches ap kolende, kai o tchatcho drom djan.

¹⁰Ko mensho, koleskro dji rowell, hi kokres. Un ninna te stell leskro dji i bachtjatar, nai haiwell kek wawar tchatchepah leskri bacht.

¹¹O kheer o tchilatchestar well tele phagedo, i familjake kolestar, kai djal o tchatcho drom, djal mishto un well bareder.

¹²Hi menshe koi, kai patsenn, kai lengro drom o tchatcho drom hi, un djinenn gar, kai anell lo len an o merepen.

¹³Ninna te sal jek, nai rowell o dji. Un pal o sapen well o ropen.

¹⁴Koon bange dromma djal, koleske djal jaake, har lo djiwas. Ninna i latcho mursheha hi jaake: job lell pale pal kowa, hoi job kras.

¹⁵Koles tchi an o shero hi, kowa patsell hako lab, hoi jek ap leste rakrell. Kones i gosewo dji hi, kowa dell jak, hoi lo krell un kai lo djal.

¹⁶O gosewo darella un rikrell pes pale o tchilatchepastar. O dinelo well sik chojedo un patsell, te nai djal leske kek tchilatchepen.

¹⁷Koon sik an i choli well, krell jek dinelo koowa pal o wawar. Un koon lell pes tchilatchepen glan, pral koleste hi le chojedo.

¹⁸Kolen tchi an o shero hi, lenna pale, hoi dran lengro dinlepen well. O gosewo djinell bud. Kowa hi leske har i rajeskri stadi, hoi krell les shukar.

¹⁹I tchilatche hunte witsrenn pen tele glan i latchende. Awa, jon hunte witsrenn pen tele glan i wudja kolendar, kai an o tchatchepen tardo hi.

²⁰Kek kamell o tchorweles, witar gar kowa, kai pash leste hi. O braweles hi bud mala.

²¹Kowa kai ap o wawareste tele dikell, anell doosh ap peste. Bachtelo well kowa, koles i dji i tchorwelenge hi.

²²Kolen, kai tchilatchepen an o shero hi, kolla djan nashedo. Kolla, kai kamenn o latchepen te krell, kolenge hi i wawar menshe latches un rikrenn ap lende.

²³Kote, kai budrenn le, wenn le ninna plaissedo. Kote, kai rakepen hi un tchi wawar, hi len gar doha djipaske.

²⁴O goswepen hi har shereskro sonakai i gosewenge. Ap o shero i narwelendar hi lengro dinlepen har i stadi.

²⁵Kowa, kai dureder penella an o tchatchepen, hoi lo dikas un shunas, kowa lell menshen dran o merepen win. Kowa, kai anell chochepen ap i wawareste pre, hi i chocheno.

²⁶Kowa, kai djiwell o baro Debleha, koles hi soor an o dji. Ninna pral leskre tchawende rikrell o baro Dewel peskre wasta.

²⁷Kowa, kai o baro Debleha djiwell, nai djiwell kek darjah. Job rikrell peskre herja pale, te perell lo gar an i dorja, hoi tserdenn les an o merepen.

²⁸Te hi i baro rajes bud menshe, palle hi lo sorelo. Te hi les gar bud menshe, djal lo tele.

²⁹Kowa, kai gar sik chojedo well, hi gosewo. Koon sik chojedo wella, sikrell har dinelo job hi.

³⁰Shukapen an o dji krell o tselo menshes sasto. I dji, hoi silwerell, hi har i nasslepen, hoi i kokale pre chal.

³¹Koon sorjah i tchorweles tele rikrell, kowa praassell koles, kai o tchorweles kras. Kones leske i baro dji hi, sharell o Debles.

³²O tchilatcho well tele witsedo dran leskro tchilatchepen. Kowa, kai an o tchatchepen tardo hi, koleskro patsepen rikrell les ninna gomme an o merepen.

³³O goswepen hi khere an o dji kolestar, kai haiwell, hoi mishto un gar mishto hi. An i dinelengre djia hi kek goswepen.

³⁴Te well hakeneste peskro tchatchepen dino an jek them, palle well kau them an-diklo. Kote, kai i menshe o tchatcho dromestar tele djan, hunte ladjenn le pen.

³⁵I baro rai dikell latches ap peskro budepaskro, kai lauter mishto haiwell. Un leskri choli well ap koleste, kai wi-ladjedo koowa krell.