Read O Debleskro Drom - I Bibla an o Romano Rakepen 2021 Gosewe laba 16 Bible Online

Gosewe laba 16 - O Debleskro Drom - I Bibla an o Romano Rakepen 2021 bible

Gosewe laba 16

¹O mensho lell pes tchomone glan an peskro dji. Hoi tchatchepah wella, penell o baro Dewel.

²Hako drom hoi i mursh djal, hi an leskre jaka tchatcho, o baro Dewel dikell dur an leskro dji.

³Tchip kowa, hoi tu kameh te krell an o baro Debleskro wast, un job mukell kowa jaake te well, har tuke glan lal.

⁴Lauter, hoi o baro Dewel kras, hi tchomoneske, ninna kras lo o tchilatcho menshes ko diweske, kai i bibacht wella.

⁵O baro Dewel dikell chojedes ap hakeneste, koles i pre-phurdo dji hi. O wast pre, kowa lell peskri phagi.

⁶Ab latches un rike pash o Debleste, un job bistrell tiri doosh. Te djiweh leha, rikreh tut pale o tchilatchepastar.

⁷Te dikell o baro Dewel latches ap kowa, hoi jek krell, palle krell lo, te wenn ninna kolla leskre mala, kai kaman leske tchilatchepen.

⁸Hi feteder, te hi tut gar bud, un kowa lal tuke khetne kek chochepah, har te well tut bud brawlepen, hoi anal khetne o chochepah.

⁹O mensheskro dji lell peske tchomone glan, o baro Dewel hi kowa, kai anell leskre herja ap ko drom, har job kamell.

¹⁰Te rakrell i baro rai, hoi o Dewel leske an o mui tchiwell, palle rakrell lo o tchatchepen win pral i mensheste jaake har tchatcho hi.

¹¹I waga, hoi o tchatcho pharepen sikrell, well o baro Deblestar. Job penas, har pharo i saster hunte well, hoi o pharepen sikrell.

¹²Te krenn bare raja tchilatcho koowa, hi kowa i djungelo koowa glan o Debleste. Te krenn le o tchatchepen, atchell lengri rajeskri beshepaskri soreles tardo.

¹³I mensho, kai o tchatchepen rakrell, krell, te dikell o baro rai latches ap leste. Job kamell o murshes o labestar.

¹⁴I baro rai, kai choirell pes, nai bitchrell jekes an o merepen. Un i gosewo mursh krell lauter, te bistrell job peskri choli.

¹⁵Te dikell o baro rai latches ap jekeste, nai djiwell kowa pre. Un leskro kamlepen hi har i brishin, hoi mukell o djob bares te well.

¹⁶Hi budeder moldo te less goswepen har te less sonakai. Te haiweh, hoi mishto un gar mishto hi, hi kowa tuke feteder har rup.

¹⁷Kolla, kai ap o tchatcho drom djan, atchenn dur krik o tchilatchepastar. Koon jak dell, hawo drom job djal, kowa dell jak ap peskro djipen.

¹⁸Koon pes bares krell, well phagedo. Un i pre-phurdo mensho perell.

¹⁹Hi feteder te weh gar an-diklo un djiweh i tchorwelentsa, har te wess jek kolendar, kolen i baro mui hi, un djiweh fun lengro tchoredo koowa.

²⁰Kowa, kai dell jak ap o lab, hoi leske penlo was, hatsell bacht, un kowa hi bachtelo, kai tchiwell peskro dji ap o baro Debleste.

²¹Kowa kai haiwell, hoi mishto un gar mishto hi, kowa well kharedo ‘gosewo mursh’. Un jek, kai latche laba hatsell, hi i latcho sikepaskro.

²²Tchatcho goswepen hi har djido pani koleske, kai les hi. O dinlepen hi i phagi kolenge, kai dinelo hi.

²³I mensho i gosewo djijeha rakrell laba, hoi mishto hi. Un kowa, hoi lo penell, sikrell i wawarende, hoi te krenn le.

²⁴Kamle laba hi har gwin[6], rakrenn kamles an o dji un denn newi soor.

²⁵Kote dell i drom, kowa i mursheske tchatches win dikell, pal i tsiro anell lo les an o merepen.

²⁶Te hi i budepaskres bok, budrell lo budeder. Leskri bok penell leske, te krell lo dureder.

²⁷I tchilatcho mensho rodell i drom, har nai dukrell lo i wawaren. Hoi lo rakrell, chatchell har jag.

²⁸I midjak mensho anell tchingepen. Un kowa, kai djungelo koowa pral wawarende rakrell, krell, te tchingrenn pen latche mala.

²⁹I tchilatcho marepaskro anell peskro rakepah peskro males ap i drom, hoi gar mishto hi.

³⁰Kowa kai i jakentsa dell un peskro mui khetne tserdell, koles hi tchilatchepen an o shero.

³¹Parne balla hi har i kutch rajeskri stadi, hoi o Dewel kolen dell, kai leskro drom djan.

³²Jek, kai gar sik chojedo wella, hi feteder har i tchatcho kurepaskro. Un koon o rai pral peste hi, hi budeder moldo har jek, kai i tselo foro dren lell.

³³O mensho witsrell tikne kashta, te djinell lo, hoi te krell. Har le perenn, kowa well o baro Deblestar.