Read O Debleskro Drom - I Bibla an o Romano Rakepen 2021 Gosewe laba 17 Bible Online

Gosewe laba 17 - O Debleskro Drom - I Bibla an o Romano Rakepen 2021 bible

Gosewe laba 17

¹I truk kotar maro un kek tchingepen hi feteder har i kheer pherdo mass o tchingepah.

²I budepaskro, kai djinell, hoi te krell, kowa well o rai pral o tchaweste ko kherestar, kai ladj ap peste anas. Ko budepaskro lell palle ninna kolestar, hoi i tchawe lenna pral pengro dadeskro merepen.

³Jaake har o rup an i jag tchiddo well, un o sonakai an i bob, jaake lell o baro Dewel i menshengre djia an o jak.

⁴Kowa, kai tchilatcho koowa krell, shunell ap midjak rakepen. Un i chocheno shunell ap sawe laba, hoi bibacht anenn.

⁵Kowa kai pral i tchorweleste sal, kowa praassell koles, kai les kras. Kowa, kai bachtelo hi pral o wawareskri bibacht, sawo lell peskri phagi.

⁶Tchawengre tchawe hi har i rajeskri stadi i phurenge. Un i tchawe sharenn pen pengro papeha un pengri mami.

⁷Kowa djal gar, te krenn i narwele bare un shukar laba. Witar gar djal, te rakrell i an-diklo mursh chochepen.

⁸Kowa, kai wawaren tchorchanes lowe dell, te krenn le, hoi job kamell, an koleskre jaka hi peskre lowe har durkepangre barra, hoi anenn leske bacht an hako koowa.

⁹Kowa, kai i doosh i wawarendar bistrell, krell peske mala. Kowa, kai pale te pale pral koi doosh rakrell, nashrell peskre malen.

¹⁰Te tchingreh jekeha, kai mukell pes tchomone te penell, lell job kowa peske budeder an o dji, har te dell jek sheel kope an i dineleste dren.

¹¹I tchilatcho mensho rodell hako tsiro tchingepen. Doleske well jek pash leste bitchedo, ko dell les i phari phagi.

¹²Hi tuke feteder, te wess pash i bari diwji margodja[7], kolake i terne krik lino wan, har te wess i dineleha khetne, kai narwelo koowa krell.

¹³Koleske latchepen kerdo was, un job tchilatchepen pale das, dran koleskro kheer djal i bibacht buder gar krik.

¹⁴Muk tele o tchingepah jaake rah har lo gomme tikno hi! Tchingepen hi har pani, hoi dran i phub win phagell. Muk tele glan kowa job sorleder well!

¹⁵Kowa hi dui kope i djungelo koowa glan o baro Debleskre jaka: te rakrell jek koles tchatches, kai doosh ap peste las, un ninna, te tchiwell jek doosh ap koleste, kai o tchatchepen kras.

¹⁶Hoske hunte dals i dinelo lowe win, te nai djal lo an i sikepaskri? Leske djal tchi an leskro shero.

¹⁷I maal sikrell hako tsiro pengro kamlepen. Un i phraal well boldo, te well lo tuke ap i rig an phare tsirja.

¹⁸Narwelo hi kowa, kai dell peskro dadeskro wast un penell, te plaissrell lo i sijaan i wawareske.

¹⁹Kowa, kai tchingepen kamell, kowa kamell ninna o tchilatchepen. Kowa kai hadell pes kokres pral, nai perell sik.

²⁰Jek dui djijentsa hatsell kek latchepen. Un jek dui tchipjentsa perell an i bibacht.

²¹Kones i tchawo hi, hoi narwelo koowa krell, koles hi i pharo djipen. I dineleskro dades hi tchi sapaske.

²²I bachtelo dji hi mishto tiro sastepaske. Te hi tuke hako tsiro ropaske, nashreh tiri soor.

²³O tchilatcho kamell i lowe, hoi leske tchorchanes dino well, te rissrell lo o tchatchepen trujel.

²⁴Kowa, kai haiwell, hoi mishto un gar mishto hi, mukell pes gar tele te rikrell, te lell lo gomme budeder goswepen. I dinelo dikell kate te kote.

²⁵I dinelo tchawo krell peskro dadeske choli. Un leskri date well ropaske pral leste.

²⁶Kowa hi gar mishto, te lell kowa i phagi, kai kek doosh ap peste anas. Gomme djungleder hi, te chal i an-diklo mensho dawa.

²⁷Kowa, kai peskre laba pale rikrell, sikrell, te djinell lo, hoi mishto hi. Kowa, kai gar sik an i choli well, sikrell, te hi lo gosewo.

²⁸Ninna i dinelo, kai rikrell peskro mui, nai well jaake an-diklo, har te wals lo gosewo. Te krell lo peskro mui gar pre, hi lo i wawarenge har i gosewo.