Read O Debleskro Drom - I Bibla an o Romano Rakepen 2021 Gosewe laba 2 Bible Online

Gosewe laba 2 - O Debleskro Drom - I Bibla an o Romano Rakepen 2021 bible

Gosewe laba 2

¹Miro tchawo, shun ap mire laba, un rike tut ap kowa, hoi me tuke penom,

²de jak ap o goswepen, un kre tiro dji pre, te haiwess lauter mishto!

³Mange mandar goswepen, un putch man, hoi te kress!

⁴Rode pal miro goswepen, har te rodals rup un i khatedo brawlepen!

⁵Palle haiweh, har nai djiweh o baro Debleha, un prindjreh les bud un budeder.

⁶O baro Dewel hi kowa, kai dell goswepen. Lestar well, te djinell un haiwell i mensho bud koowa.

⁷Kolen, kai an o tchatchepen tardo hi, dell lo, hoi len hunte well. Un dell jak ap kolende, kai leskro drom djan, te krell lenge kek tchomone.

⁸Job well ap i rig kolenge, kai krenn o tchatchepen, un rikrell peskre wasta pral kolende, kai djan ap leskro drom.

⁹Palle haiweh, hoi glan o Debleste mishto un tchatcho hi, har nai djah ap leskro drom, un djiweh i djipen, hoi an leskre jaka latcho hi.

¹⁰O Debleskro goswepen well an tiro dji, un hoi job tute sikrell, hi tuke shukar.

¹¹Un tu deh jak, har te djiwess, un djineh, hoi mishto hi,

¹²un weh gar ap i tchilatcho drom, un shuneh gar ap i menshende, kai chochepen rakrenna,

¹³un o tchatcho drom mukan, un i djipen an o tchilatchepen djiwenn.

¹⁴Lenge hi shukar, te krenn le tchilatcho koowa, un jon sanenn, te krenn le djungelo koowa.

¹⁵Lengre dromma hi bango, o tchatcho dromestar djan le tele.

¹⁶Ma kre har jon, te peress gar dren ap i shukar laba i djuwjatar kai i wawareskri romni hi,

¹⁷un mukas peskro romes, koleha li khetne djas har li terno his, un bistras, hoi li peskro romeste sowel das glan lakro Debleste.

¹⁸Te djah an lakro kheer, weh ap i drom, hoi djal an o merepen. Lakre dromma djan an o mulengro them.

¹⁹Hakeno, kai djal pash late dren, well gar buder pale, un well gar ap o drom, hoi an o djipen anell.

²⁰Doleske dja tu o drom, kai i latche djana, un atch an o tchatchepen tardo.

²¹Kolla, kai an o tchatchepen tardo hi, un o Debleskro drom djan, djiwenn an kau them un atchenn koi dren.

²²Kolla, kai o tchilatchepen krenn un o Debles mukenn, wenn win tradedo dran o them, jaake te hatseh buder kek lendar.