Read O Debleskro Drom - I Bibla an o Romano Rakepen 2021 Gosewe laba 21 Bible Online

Gosewe laba 21 - O Debleskro Drom - I Bibla an o Romano Rakepen 2021 bible

Gosewe laba 21

¹O baro rajeskro dji hi har i lengsto pani an o baro Debleskro wast, hoi mukell lo kote te nashell, kai job kamell.

²Hako drom i menshestar hi mishto an peskre jaka. O baro Dewel dikell palla, hawo dji koi palla tardo hi.

³Te djah o tchatcho drom un djiweh pal o Debleskro tchatchepen, hi kowa o baro Debleske budeder moldo har te anals leske viechen.

⁴I tchilatchen hi i pre-phurdo dji un jaka, hoi tele dikenn ap i wawarende. Kowa hi lengri doosh.

⁵Rake tiro djijeha pral kowa, hoi kameh te krell, un palle kre les tiri tseli sorjah. Un tut well bud djipaske. Kowa, kai lauter sik sik krella, koles hi tchi.

⁶Ko brawlepen, hoi khetne anlo was o chochepah, hi har o ducho, hoi sik krik djal kolendar, kai o merepen rodenna.

⁷I tchilatche kamenn gar te djiwell pal o tchatchepen. Ko tchilatcho koowa, hoi krenn le ap i wawarende, anell len jaake dur, te nashrenn le halauter.

⁸Kowa, kai doosh ap peste anas, djal bange dromma. Koles, kai i djudjo dji hi, krell o tchatchepen.

⁹Hi feteder te djiwell jek win ap i dacha, har dren an o kheer khetne i romjah, kai o tselo tsiro tchingepen rodell.

¹⁰Tchilatche menshen hi o tselo tsiro bok pal o tchilatchepen. Len hi kek dji i wawarenge.

¹¹Te lell i pre-phurdo peskri phagi, wenn ninna kolla gosewo, kolen tchi an o shero hi. Te aneh i goseweske tchomone pashel, djinell lo budeder.

¹²O Dewel hi an o tchatchepen tardo, un lell o tchilatcheskri familja an i jak, un witsrell i tchilatchen an i bibacht.

¹³Kowa, kai jaake krell, har te shunell lo gar koi gole ko tchorwelestar, leske djala jaake, kai dell job ninna gole un kek shunell les.

¹⁴Te hi jek chojedo ap tute, un tu deh les tchomone khatedo, kreh tu jaake, te djal leskri bari choli pale.

¹⁵Te well o tchatchepen kerdo, hi kolla bachtelo, kai an o tchatchepen tardo hi, un i tchilatche darenn pen.

¹⁶I mensho, kai kamell gar te djinell, hoi gosewo hi, djal ap o drom pash i mulende.

¹⁷Kowa, kai kamell i shukar djipen un dell bud lowe koleske win, kowa well tchorwelo. Un kowa, kai kamell mool un kutch djet makepaske, well gar brawelo.

¹⁸Ap i tchilatchende un i phukepangre well koi bibacht anlo, hoi kaman le te anell ap i latche un tchatche menshende.

¹⁹Hi feteder te djiwell jek an o mulo tato them har khetne i romjah, kai o tselo tsiro tchingepen rodell un chojedo hi.

²⁰I shukar brawlepen un kutch djet hi an o kheer kolestar, kai gosewo hi. I dinelo dell peskre lowe sikeder win, har lell lo len.

²¹Kowa, kai o tchatchepen un o latchepen palla nashell, kowa hatseh o djipen un well an-diklo.

²²I gosewo mursh nai djal pre ap i foro, kai lauter tchatche kurepangre dren hi, un phagell ko foro tele, kolestar jon patsan, te hi lo soreles tardo.

²³Kowa, kai nai rikrell peskro mui un dell jak ap peskri tchip, sawo rikrell bibacht pestar krik.

²⁴Ko baro-mujeskro, kai dikell tele ap i wawarende, well pre-phurdo kharedo. Job patsell, te nai krell lo lauter un kek les pale rikrell.

²⁵Kol tchi-molde, kai kamenn gar te budrell, merenna i bokatar.

²⁶O tselo diwes djal lenge kowa an o shero trujel, hoi kamenn le te lell. Kowa, kai an o tchatchepen tardo hi, kowa dell un rikrell gar pale.

²⁷Kowa, hoi anenn i tchilatche o baro Debleske, hi djungeles glan leskre jaka. Har bud budeder, te krenn le kowa dran i tchilatcho dji.

²⁸Kowa, kai chochras, har penas lo, hoi lo dikas un shunas, ap koleskro shero well leskro chochepen pale. Ko mursh, kai mishto shunas, hoi leske penlo was, koles mukenn le rakrell, un hoi job penell, atchell lenge an o shero.

²⁹O tchilatcho stakrell soreles pre i baro mujeha. Kowa, kai o tchatchepaske tardo hi, mukell gar peskro drom.

³⁰Kote dell kek goswepen, tchi hoi jek feteder nai djinals un penals, har nai krell o baro Dewel.

³¹Tu nai leh i kurepaskro grai un djah an o marepen. Kowa, kai krell, te wess o sorleder, hi o baro Dewel.