Read O Debleskro Drom - I Bibla an o Romano Rakepen 2021 Gosewe laba 22 Bible Online

Gosewe laba 22 - O Debleskro Drom - I Bibla an o Romano Rakepen 2021 bible

Gosewe laba 22

¹Te rakrenn le pral tute latcho koowa, hi kowa feteder har baro brawlepen. Te dikenn le latches ap tute, hi kowa feteder har rup un sonakai.

²Brawelen un tchorwelen hi jek koowa khetne: Kol dujen kras o baro Dewel.

³Koles i gosewo dji hi, kowa dikell, har i bibacht wella un khatrell pes. Kolen tchi an o shero hi, kolla nashenn dureder, un i bibacht well ap lende.

⁴Kowa, kai krell pes gar bares un djiwell o baro Debleha, lell brawlepen un sharepen un o tchatcho djipen.

⁵O drom, kai i tchilatche djana, hi pherde subjengre burra un shelle, kai nai stakrenn le dren. Kowa, kai ap peskro djipen jak dell, djal kote gar.

⁶Sike i tikno tchawes peskro drom, palle djal job gar kolestar krik, ninna te well lo phuro.

⁷O brawelo hi o rai pral o tchorweleste. Un kowa, kai patsell peske lowe, hunte budrell koleske, pash koleste job sijaan hi.

⁸Kowa, kai chochepen win witsrell har djob, kowa anell bibacht dren. Palle nai djal lo buder gar i wawarentsa jaake trujel har job kamell.

⁹Kowa, kai latches ap i wawarende dikell, dell peskro maro i tchorweleste. Ap leste well bacht wi-rakedo.

¹⁰Trade ko pre-phurdes win, kai sal pral halauter. Palle djal o tchingepen leha. Un kol tchilatche laba un o praassepen djan ninna krik.

¹¹Kowa, koles i djudjo dji hi un latchepen rakrell, koleskro maal hi o baro rai.

¹²O baro Dewel dell jak, te well diklo, haweskre laba mishto un tchatcho hi. Un job tchakrell kol laba pre, hoi i phukepaskro rakras.

¹³Ko tchi-moldo, kai kamell gar te budrell, penell: I lewo hi win ap o drom, kai nai chals man.

¹⁴O mui i wawareskro romjatar hi har i gruba, hoi dur tele an i phub djal. Un kolla perenn dren, pral kolende o baro Dewel chojedo hi.

¹⁵Tikne tchawe krenn dinelo koowa. Te chan le dawa, krenn le kowa buder gar.

¹⁶Kowa, kai rikrell i tchorweles tele, te well job kokres brawleder, ninna kowa, kai dell i braweles tchomone, kowa krell, te well lo kokres tchorwelo.

¹⁷Shun mishto un de jak ap i laba kol gosewendar! Le mire laba an o dji, hoi tuke sikrenn, hoi mishto un tchatcho hi.

¹⁸Ma biste len! Har shukar hi, te nai peneh len dureder!

¹⁹Kamoms, te dikess un rikress ap o baro Debleste. Doleske penau me tuke kowa kau diwes.

²⁰Me tchinom tuke 30 (trijanda) laba pre, hoi tuke penenn, hoi te kress, hoi tuke mishto hi,

²¹te sikrap tute, hoi o tchatchepen hi, jaake te nai peness koleske, kai tut bitchras, hoi lo kamell te djinell.

²²Ma rande o tchorweles win, doleske kai lo tchorwelo hi! Te hal leha glan i tchatchepangre, ma le leskro tchatchepen krik.

²³O baro Dewel lell lengro koowa an o wast. Un kowa, kai len win randas, koleske lell job o djipen krik.

²⁴Muk tut gar dren jekeha, kai sik an bari choli well. Ma ab leha khetne beshdo!

²⁵Palle nai djal tuke jaake, te weh har job, un pereh an i bibacht.

²⁶Ma ab jek kolendar, kai denn pengro dadeskro wast un penenn, te plaissrenn le i sijaan i wawarenge.

²⁷Te nai plaissreh lat palle gar, lenn le ninna tiro tchiben tel tute krik.

²⁸Ma tchip kol phure barra krik, hoi sikrenn har baro tiro them hi, un hoi tire phure kote tchiwan.

²⁹Dikeh i mursh, kai peskri budi haiwella, palle djiness, kowa nai budrell bare rajenge. Sawenge, kai gar an-diklo hi, budrell lo gar.