Read O Debleskro Drom - I Bibla an o Romano Rakepen 2021 Gosewe laba 25 Bible Online

Gosewe laba 25 - O Debleskro Drom - I Bibla an o Romano Rakepen 2021 bible

Gosewe laba 25

¹Ninna kalla hi gosewe laba o Salomestar. I sikepangre an o kheer o baro rajestar Hiskija lan kal laba khetne. O Hiskija his o baro rai pral o them Juda.

²O Dewel well sharedo koleske, hoi job khatedo rikrell. O baro rai well sharedo koleske, hoi job pre tchakrell.

³O bolepen djal dur pre, un i phub djal dur tele, un kek nai djinell, hoi an o baro rajeskro dji hi.

⁴Le i tchik dran o rup win, palle nai krell kowa, kai budrell o rupeha, i shukar tcharo kolestar.

⁵Le o tchilatches krik o baro rajestar, palle atchell job i baro rai, kai an o tchatchepen tardo hi.

⁶Ma kre tut bares glan o baro rajeste, un pash i pralstunende ab gar tardo!

⁷Hi feteder, te penenn le ap tute ‘ab kate pre’, har te bitchrenn le tut tele kotar, kai beshal tut, un denn tiri beshepaskri i wawareste, kai budeder an-diklo hi.

⁸Ma dja sik pash i tchatchepangre murshende, te peness lenge, hoi dikal. Te well palle i wawar un sikrell, kai hi tut gar tchatcho, hoi kreh tu palle?

⁹Te hi tut i tchingepen i wawareha un mukeh o tchatchepen win te krell mashkral tumende, ma rake pral kowa, hoi djineh khatedes lestar.

¹⁰Te kreh tu kowa, shunenn wawar menshe kolestar un kharenn tut ‘phukepaskro’. Un kowa well tuke gar buder bistedo.

¹¹I lab rakedo an o tchatcho tsiro, hi har sonakangre phabja an i rupeno tcharo.

¹²I gosewo mensho, kai trad dell, un i kand, hoi ap leste shunell, kolla hi har i sonakaskri gustri un i sonakaskri werkli trul i meen.

¹³I mursh o labestar hi koleske, kai les bitchras, har shila pani an ko tato tsiro, kai o djob dren anlo well, un dell les newi soor.

¹⁴Kolla, kai penenn, te denn le tchomone, un palle denn le kowa gar, kolla hi har wolke un i phurdepen, hoi denn kek brishin.

¹⁵Bud latche labentsa nai tserdeh pralstunen ap tiri rig. Un i kamlo rakepen phagella kokale khetne.

¹⁶Te hatsal gwin, palle cha gar budeder har tuke mishto hi, te wess gar tchalo lestar un hunte tchadess les pale win.

¹⁷Ma dja hako kopo pash tiro maleste khere. Les nai wals o nak tutar pherdo un wals chojedo ap tute.

¹⁸Kowa, kai ap i wawareste chochepen pre anell, sawo hi har i tower, un i charo, un tchinell har i tchuri.

¹⁹Te hi tut i kalo diwes un dikeh ap i maleste, te well lo ap tiri rig, un job hi kek mursh o labestar, palle hi kowa, har te dandals ap i tele phagedo dand, un har te nashals ap jek heri.

²⁰Te giweh gilja jekeske, koleskro dji rowella, palle hi kowa leske, har te randjell jek i baja win ap i shil diwes, un har te tchorell jek shut an i dukepen.

²¹Te hi koles bok, kai kamell tuke tchilatchepen, palle de les maro te chal. Un te hi les trush, de les pani te pijell!

²²Palle chatchell les an leskro dji un les khaitell, hoi lo kras. Un o baro Dewel dell tut tiro latchepen pale.

²³I phurdepen un kale wolke anenn brishin, un i tchip, hoi pal o wast rakrell, anell choli.

²⁴Hi feteder te beshess ap i dacha, har an o kheer khetne i romjah, kai hako tsiro tchingepen rodell.

²⁵I liil dran i dur them latche labentsa hi har shil pani koleske, kai trushella.

²⁶Har i djungelo pani un i brunna, hoi khandella, hi jek, kai an o tchatchepen tardo hi un glan i tchilatcheste trissella.

²⁷Bud gwin hi gar mishto. Jaake hi ninna, te shareh tu i wawares bud shukar labentsa.

²⁸Jaake har i foro, kai kek massuri trul leste hi, jaake hi i mursh, kai nai rikrell gar peskri choli pale.