Read O Debleskro Drom - I Bibla an o Romano Rakepen 2021 Gosewe laba 26 Bible Online

Gosewe laba 26 - O Debleskro Drom - I Bibla an o Romano Rakepen 2021 bible

Gosewe laba 26

¹Har gib an i nijal un har depen an ko tsiro, kai anenn le o djob dren, jaake djal gar, te well o dinelo sharedo!

²Har i tchirklo, hoi hadell pes an o bolepen, un well gar tele pash i mensheste, jaake hi o praassepen, hoi was win rakedo pral jekeste, kai kek doosh ap peste anas. Ko praassepen taprell les gar.

³I tchupni o grajeske, un i ledertikri rima trul i meen i eslatar, un i kasht ap o dumo i dinelestar.

⁴Ma rake dinlepen ap i dineleste pale, te wess gar har job!

⁵Rake i dineleha, kai rakrell dineles ap tute, jaake te haiwell lo, har dinelo job hi.

⁶Kowa, kai i dinelo bitchepaskres bitchrell, kowa hi har jek, kai dell peske kokres i herja tele un chal dawa.

⁷Har i herja i bango menshestar kek soor an lende hi, jaake hi i gosewo lab an o mui i dinelestar.

⁸Jek, kai sharell o dineles hi har jek, kai pandell i bar jaake soreles an i witsepaskri, te nai witsrell lo les gar.

⁹I subjengro kasht an o wast kolestar, kai mato hi, jaake hi i gosewo lab an o mui i dinelestar.

¹⁰Har jek, kai trul peste karje dell, un hakenes dukrell, jaake hi kowa, kai lell i dineles, te budrell lo leske, oder sawen, kai djan ap o drom.

¹¹Har i djuklo, hoi pale chal, hoi lo win tchadas, jaake hi o narwelo, kai krell pale te pale dinelo koowa.

¹²I dinelo nai well sikeder gosewo har jek, kai pestar kokres patsell, te hi lo gosewo.

¹³Ko tchi-moldo, kai kamell gar te budrell, kowa penell: Win hi i lewo, awa, mashkral ap o drom hi i lewo.

¹⁴Jaake har i wudar rissrell pes an i rikepangre, jaake rissrell pes an peskro tchiben ko tchi-moldo, kai kamell tchi te budrell.

¹⁵I tchi-moldo, kai kamell tchi te krell, tchiwell peskro roi an o tcharo, un anell peskro wast gar pash o mui.

¹⁶I tchi-moldo, kai kamell gar te budrell, hi an peskre jaka gosweder har efta, kai djinenn, hoi mishto un tchatcho hi.

¹⁷Kowa, kai pes dren mukell an i wawarengro tchingepen, kowa hi har jek, kai taprell i djukles pash i kanda.

¹⁸Har i baro dinelo, kai trul peste karje dell un menshen mulo karje dell,

¹⁹jaake hi ko mursh, kai peskro males chochell, un palle penell: Hoi krom, his sapaske.

²⁰Kote, kai buder kek kasht hi, kote djal i jag win, un kote, kai kek buder hi, kai chochepen ap wawarende pre anell, kote djal o tchingepen krik.

²¹Jaake har krell o kasht, te chatchell i jag dureder, jaake krell i mursh, hoi tchingepen rodell, te djal o tchingepen dureder.

²²Kol laba kolestar, kai chochepen ap wawarende pre anell, hi har latcho chapen, un djan tele har djet.

²³Har tchare dran chatchedi tchik, pral kolende rup maklo was, jaake hi o mui, hoi shukar laba rakrella, hoi wenn dran i tchilatcho dji.

²⁴I midjak mensho hi pherdo chochepen. Kowa khatrell lo pal shukar laba.

²⁵Te rakrell lo ninna jaake kamles, ma pats leske! Les hi efta bengeskro koowa an leskro dji.

²⁶Ninna te khatrell lo peskri choli ap i wawarende pal shukar laba, well ko diwes, kai dikell hakeno leskro tchilatchepen.

²⁷Kowa, kai i wawareske i gruba win hadas, kowa perell kokres dren. Un jek, kai witsrell i bar, ap koleste perell lo pale tele.

²⁸Kowa, kai chochepen rakrell, kamell o wawareske tchilatchepen te krell un les dukrell. Un kowa, kai gudle labentsa rakrell, anell i bibacht.