Read O Debleskro Drom - I Bibla an o Romano Rakepen 2021 Gosewe laba 29 Bible Online

Gosewe laba 29 - O Debleskro Drom - I Bibla an o Romano Rakepen 2021 bible

Gosewe laba 29

¹Koon mukell pes tchi te penell, un djal hako tsiro pal peskro shero, sawo wella ap jek kopo phagedo, un kek hi palle koi, kai hadell les pale pre.

²Te hi bud menshe koi[10], kai an o tchatchepen tardo hi, palle hi i tsele menshe bachtelo. Te hi i tchilatcho o rai pral lende, palle hi i tsele menshenge ropaske.

³Kowa, kai kamell o goswepen, krell peskro dades bachtelo. Kowa, kai pes lubjentsa dren mukell, nashrell peskro brawlepen.

⁴I baro rai, kai rikrell pes ap o tchatchepen, kowa krell, te djal o themeske latches. Kowa, kai lell bud themeskre lowe peskre menshendar, kowa krell o them paash.

⁵Kowa, kai makell i wawareske gwin trul o mui, kowa tchiwell i netsa khatedo win glan koleskre pire.

⁶I tchilatcho taprell pes an peskro tchilatchepen. Kowa, kai an o tchatchepen tardo hi, djal bachteles peskro drom.

⁷Kowa, kai an o tchatchepen tardo hi, kowa dell ninna jak, te lell o tchorwelo peskro tchatchepen. I tchilatche djinenn gar, hoi tchatcho hi.

⁸Kol pre-phurde, kai djinenn lauter feteder, krenn i tselo fores diwjes. I gosewe haiwenn, har te lenn le lengro tchingepen krik.

⁹Te well i gosewo khetne i dineleha pash o tchatchepaskro mursheste, te well o tchatchepen wi-kerdo, palle well o dinelo diwjo un sal. Tchi dikell lo dren.

¹⁰I marepangre hi chojedo pral koleste, kai kek doosh ap peste anas. Kolla, kai an o tchatchepen tardo hi, denn jak ap koleskro djipen.

¹¹I dinelo rikrell peskri choli gar pale. I gosewo hi o rai pral peskri choli.

¹²I rai, kai ap chochene laba shunella, koleskre budepangre wenn lauter chochene.

¹³O tchorwelo un kowa, kai les tele rikrell, kol dujen hi jek koowa khetne: Kol dujende das o baro Dewel jaka.

¹⁴I baro rai, kai dell i tchorwelen lengro tchatchepen, atchell rai i rah tsiro.

¹⁵Te lell i tchawo i phagi un well leske penlo, hoi lo gar mishto kras, palle well lo gosewo. I tchawo, kai ap peste kokres jak hunte dell, sawo anell ladj ap peskri date.

¹⁶Kote, kai bud tchilatche hi, kote hi ninna bud doosh. Well ko tsiro, kai dikenn kolla, kai an o tchatchepen tardo hi, har i tchilatche perenn.

¹⁷Sike tiro tchawes soreles, hoi lo gar mishto kras. Palle krell lo tut bachtelo. Un tu hunte ladjess leske gar.

¹⁸Te hi kek Debleskro rakepen koi, palle wenn i menshe diwjo un bi-pandlo. Bachtelo hi kowa, kai shunell ap o Debleskre laba.

¹⁹I labentsa mukell pes o budepaskro tchi te sikrell. Ninna te haiwals job, rikrell lo pes gar ap kowa.

²⁰Dikeh tu i murshes, kai sik ap o rakepen hi, i dineleske nai djal feteder har saweske.

²¹Te deh tu tiro budepaskres lauter, hoi kamell lo, fun tiknes pre, palle well ko diwes, kai shunell lo buder gar ap tute.

²²I mursh, kai hako tsiro an i choli hi, sawo krell tchingepen, un anell bud doosh ap peste.

²³O pre-phurdepen i menshestar krell, te perell lo. Kowa, kai hadell pes gar, well an-diklo.

²⁴Kowa, kai djal khetne jekeha, kai tchorell, tchinell pes an peskro mass: job djinell, o praassepen hunte wals ap leste, te penell lo tchi. Un job kamell tchi te penell[11].

²⁵Kowa, kai darell i menshendar, perella. Kowa, kai rikrell pes ap o baro Debleste, pral koleste rikrell lo peskre wasta.

²⁶Bud rodenn i rajes pre, te rakrenn le leha. Kowa, kai dell o menshes peskro tchatchepen, hi kokres o baro Dewel.

²⁷Chojedo pral kolende, kai tchilatcho koowa krenn, hi kolla, kai o tchatchepen krenn. Un chojedo pral koleste, kai o tchatchepen krell, hi kolla, kai tchilatcho koowa krenn.