Read O Debleskro Drom - I Bibla an o Romano Rakepen 2021 Gosewe laba 30 Bible Online

Gosewe laba 30 - O Debleskro Drom - I Bibla an o Romano Rakepen 2021 bible

Gosewe laba 30

¹Kolla hi laba, hoi rakras o Agur, koleskro dad o Jake his, dran Massa. Kau mursh penas: Me marom man tele, mo Dewel, me marom man tele, mo Dewel, un djinau gar buder dureder.

²Har i viecho hom, un menshengro goswepen hi man kek.

³Kek sikras man har te wap gosewo, un djinau tchi o Deblestar.

⁴Koon djas pre an o bolepen un pale tele? Koon las o phurdepen[12] an peskre wasta? Koon pandas i tsele panja an i baja? Koon penas, har dur i phub te djal? Har kharell lo? Har kharell leskro tchawo? Djineh tu kowa?

⁵O Dewel rikrell hako lab, hoi das lo. Job rikrell peskre wasta pral kolende, kai wenn pash leste, te dell lo jak ap lende.

⁶Tchip kek lab pash kowa pashel, hoi job penas, te dell lo tut gar trad, un hakeno dikell, kai hal i chocheno.

⁷Mo Dewel, dui koowa mangau me tutar. De len mande jaake rah har djiwau:

⁸Rike man pale, te chochap! Un ma kre, te wap tchorwelo un witar gar, te wap brawelo. De man kokres, hoi man hunte well o djipaske.

⁹Te wals man budeder har man hunte well, nai penaus: “Koon hi o baro Dewel?” Un te wals man gar doha, nai tchoraus un anaus ladj ap miro Debleste.

¹⁰Ma an chochepen pre ap i budepaskro pash leskro rajeste, te rakrell job kek bibacht pral tute win, un tu hunte plaissress koleske.

¹¹Hi menshe koi, kai rakrenn pral pengro dad bibacht win, un penenn kek latcho lab pral pengri date.

¹²Hi menshe koi, kai an pengre jaka djudjo hi, un lengro djungelo koowa was gar tele thodo.

¹³Hi menshe koi, kai patsenn pendar, har latcho jon hi, un dikenn tele ap hako wawareste.

¹⁴Hi menshe koi, kolengre danda dukrenn har chare un tchinenn har tchurja. Un jon chan i tchorwelen an o them, un kolen, kai lenge kek ap i rig well.

¹⁵Hi menshe koi, kai hi har ko kirmo, hoi o rat pijell. Koles hi dui tcha. Kolla kharenna: “De kai! De kai!” Triin hi koi, kai gar tchalo wenn, un star penenn an kek tsiro: “Kanna hi man doha”:

¹⁶o mulengro them; o per i djuwjatar, kai lell kek tchawe; i phub, kai gar bud brishin dell; un i jag, hoi gar gole dell ‘Kanna hi doha!’.

¹⁷Kowa, kai praassell peskro dades, un kamell gar ap peskri date te shunell, koleske hunte dens i korake i jaka win, un i bare tchirkle hunte chans len.

¹⁸Triin koowa hi mange jaake baro, te haiwau len gar. Un o startestar djinau me tchi:

¹⁹O drom o baro tchirklestar, har hadell lo pes an o bolepen; o drom o sapestar ap i bare barra; o drom fun i shiffo ap o baro pani; un o drom o murshestar pash i terni djuwjate.

²⁰I djuwel, kai chochell peskro romes un sowell i wawareha, thowell pes pal kowa un penell: “Me krom kek tchilatchepen”, jaake har te chals li un thowals peske o mui tele.

²¹Tel triin koowa trissell i phub, un tel o starto rikrell li les gar win:

²²Tel i budepaskro, kai i baro rai was; un tel i narwelo, kai brawelo was;

²³tel i tchilatchi djuwel, kai well romedino. Un tel i budepaskretsa, kai las koi platsa peskri rajetsa dren.

²⁴Star vieche hi i tikneder ap kai phub, un hi gosweder har i gosewe menshe:

²⁵I kirja: Ninna te hi len kek soor, anenn le pengro chapen khetne an i nijal.

²⁶I bergetikre shoshoja: Len hi witar gar bud soor un krenn pengre khera an i bare barra.

²⁷I stepangre: Len hi kek rai un djan win har kurepangre, kolenge penlo was, har le hunte djan.

²⁸I eideksa: Tu nai taprell lat i wastentsa, un hatseh lat ninna an i sorele shukar khera i bare rajendar.

²⁹Triin hi, kai railes pre stakrenn, un o starto hi o raileder:

³⁰O lewo, ko sorleder mank i viechende: Glan kekeste djal lo pale;

³¹o bashno, har djal lo pre-phurdemen trujel; o mursh busni; un o baro rai, har djal lo glan peskre lurdende.

³²Te hals jaake dinelo, te hadal tut pre, un lal tut tchilatcho koowa glan, atch un tchip o wast ap tiro mui!

³³Te deh thud, well kolatar khil. Te deh jekes ap o nak, ratell kowa. un te mukeh i choli win, well tchingepen.