Read O Debleskro Drom - I Bibla an o Romano Rakepen 2021 Gosewe laba 31 Bible Online

Gosewe laba 31 - O Debleskro Drom - I Bibla an o Romano Rakepen 2021 bible

Gosewe laba 31

¹Kolla hi i laba, hoi rakras i dai o baro rajestar Lemuel ap leste. O Lemuel his o baro rai pral Massa.

²Miro tchawo, koles me ap i phub anom, tu, ko tchawo, koles o Deblestar mangom, hoi penap tuke?

³Ma de tiri soor i djuwjenge! Ma dja ko drom, ap koleste i bare raja nashedo djan.

⁴Ma pi tut mates! Mool un chatchedo pipen hi tchi bare rajenge un pralstunenge.

⁵Te pijenn le, nai bistrans le, hoi o Dewel lendar kamell, un dikenn buder gar koi pre, te lenn i tchorwele pengro tchatchepen.

⁶Denn sorelo pipen kolenge, kai ap o merepen tchiddo hi, un mool kolenge, kai lenge ropaske hi.

⁷Sawe nai pijenna, te nai bistrenn le pengri bibacht un kowa, hoi lengre djia dukrell.

⁸Kre tu tiro mui pre kolenge, kai gar nai rakrenna, hakeneske, koles gar i soor hi, te anell lo peske kokres peskro tchatchepen dren.

⁹Kre tiro mui pre, kre o tchatchepen jaake win, te lell hakeno peskro tchatchepen, ninna i tchorwele un bibachtele.

¹⁰I latchi romni, koon hatsell lat? Joi hi budeder moldo har kutch barra.

¹¹Lakro rom nai patsell lat un djinell, te rikrell li pash leste. Un dran kowa hoi les hi, krell li gomme budeder.

¹²Joi krell leske latchepen un kek tchilatchepen, jaake rah har djiwell li.

¹³Joi lell bakrengro bal un laintikre thaba, un budrell bachteles peskre wastentsa.

¹⁴Joi anell chapen khetne fun dural har i shiffo, hoi paredo koowa anell.

¹⁵Joi stell pre, kote hi gomme rati, un krell o chapen peskro khereske, un penell i djuwjenge, kai lake budrenn, hoi te krenn le.

¹⁶Joi rodell i hachetikri phub un ginell lat, un kol lowentsa, hoi lakre wasta dren anan, tchiwell li terne drakengre ruka an i phub.

¹⁷Joi budrell phares un krell peskre mussja soreles.

¹⁸Joi haiwell, te anell lakri budi tchomone dren. Ninna rati djal pash late i momeli gar win.

¹⁹Joi lell koi thabeskri spindla an o wast, un krell peskre thaba.

²⁰Joi krell peskro wast pre i tchorwelenge, un dell kolende, kolen gar doha hi.

²¹Joi darell gar peskro khereske, te well o wend. Hakenes an lakro kheer hi tate koola.

²²Plachte krell li peske, rido hi li an latcho laintikro than un lolo bakrengro bal.

²³Lakro rom hi an-diklo an o foro, te rakrell lo pes tele i phurentsa.

²⁴Kutch gada krell li un bikrell len, un i parepangre lenn latar kol pereskre dorja, hoi jon bikrenn.

²⁵Joi hi sorelo un an-diklo, un joi darell gar o tsirestar, hoi wella.

²⁶Lakro rakepen hi pherdo goswepen, un latche labentsa sikrell li, har tchomone djal.

²⁷Joi dikell pal lauter, hoi an o kheer kerdo well. Un ko mareske, hoi li chal, budras li.

²⁸Lakre mursh tchawe stakrenn glan un sharenn lat. Un lakro rom sharell lat kal labentsa:

²⁹“Bud romja hi bud moldo, tu hal i latcheder lendar lauterendar!”

³⁰O shukapen atchell gar, un i shukar djuwel well ninna phuro. I romni, kai djiwell o baro Debleha, kolat sharenn le.

³¹Parkrenn tumen pash late lautereske, hoi joi kras! Giwenn kolestar ap i platse an o foro!