Read O Debleskro Drom - I Bibla an o Romano Rakepen 2021 Gosewe laba 6 Bible Online

Gosewe laba 6 - O Debleskro Drom - I Bibla an o Romano Rakepen 2021 bible

Gosewe laba 6

¹Miro tchawo, dal tu tiro dadeskro wast i wawareske un penal, te plaissreh koleskri sijaan?

²Pandal tut tiro labeha? Hal tu pandlo an tiro rakepen, hoi dran tiro mui was?

³Palle hal tu an o wawareskro wast, miro tchawo. Kanna kre lauter, te wess pale win! Dja pash leste, rake ap leste dren! Muk gar tele, te mangess lestar, te mukell lo tut win.

⁴Rode kek sopen! Muk tire jaka gar dren te sowell!

⁵Tserde tut win dran leskre wasta har i wesheskri busni dran i pandle dorja, un har i tchirklo dran o wast kolestar, kai tapras les.

⁶Tu tchi-moldo, kai kameh gar te budrell, tuke penau: Dja pash i kiri, dik hawi budi joi krell! Un ab gosewo!

⁷Kolat hi kek pralstuno, kek rai, kek, kai lake penell, hoi te krell li.

⁸An i nijal anell li peskro chapen khetne. Un an ko tsiro, kai o djob dren anlo well, lell li peskro chapen khetne o tsireske, kai tchi dell.

⁹Tu tchi-moldo, kai kameh gar te budrell, har rah kameh gomme tchiddo te atchell? Kaana kameh tu pre te stell?

¹⁰Tu peneh: “Muk man gomme i tikno tsiro te sowell, i duito kopo i jaka te pandell, un i wasta an i gali te tchiwell.”

¹¹Un jaake well o tchorwlepen pral tute har i tchorepaskro, kai lell tuke lauter krik, hoi tut hi.

¹²I tchilatcho mensho un i tchi-moldo hi kowa, kai chochepen rakrell,

¹³kai i jakentsa dell, peskre herjentsa i sikepen krell, un i gustjentsa khatemen sikrell.

¹⁴An peskro dji hidjrell lo tchilatchepen, un hako tsiro anell lo tchingepen.

¹⁵Doleske well leskri bibacht sik pral leste. Sik hi lo dukedes ap i phub tchiddo, un kek sastepen hi leske koi.

¹⁶Shob koowa hi, ap kolende dikell o baro Dewel chojedes; un i eftato koowa hi leske o djungleder:

¹⁷jaka, kai dikenn tele ap i wawarende; i mui, hoi rakrell chochepen; wasta, hoi marenn sawen, kai kek tchilatchepen kran;

¹⁸i dji, hoi tchilatcho koowa peske glan lell; herja, hoi sik tchilatcho koowa palla nashenn;

¹⁹jek, kai tchomone ap i wawareste pre anell, hoi gar tchatcho hi; jek, kai anell tchingepen mank phralende.

²⁰Miro tchawo, rike tut ap i laba tiro dadestar! Ma biste ko drom, hoi tiri dai tute sikras.

²¹Tchip lengre laba an tiro dji, pande len tuke trul tiri meen har i werkli.

²²Te djah, sikrenn le tuke o drom, te tchiweh tut, denn le ap tute jak. Un te steh pale pre, wenn le tuke an o shero.

²³Kowa, hoi tiro dad un tiri dai tuke pashel anan, hi har i momeli ap tiro drom. Te denn le tut trad, rikrenn le tut ap o drom, hoi o djipen anell.

²⁴Lengre laba rikrenn tut pale, te djas gar pash i romjate i wawarestar, te shuness gar ap i shukar laba i wawar djuwjatar.

²⁵Muk tiro dji gar lakro shukapen palla te nashell! Muk tut gar lakre shukar jakentsa te taprell!

²⁶Tu djineh, i lubjake hunte dess gar budeder har jek maro. I romjake i wawar murshestar hunte dess tiro djipen.

²⁷Nai hidjrell jek i jag tel peskre koola jaake te chatchenn le gar?

²⁸Nai nashell jek ap kasht, hoi chatchell, un chatchrell peskre pire gar?

²⁹Jaake djal koleske, kai pash i romjate i wawarestar djal. Hakeno, kai lat an-taprell, lell peskri phagi.

³⁰I ladj koleske, kai bokas un doleske tchoras

³¹un palle tapedo was, hi gar jaake baro har koi ladj koleske, kai las pes i wawareskri romni. Ko tchorepaskro hunte dell efta kope jaake bud pale, har tchoras lo, ninna te hi kowa lauter, hoi les hi. Kowa, kai las peske i wawareskri romni, kowa hi narwelo. Sawo koowa krell kokres jek, kai kamell buder gar te djiwell.

³³Dawa un ladj perenn ap leste, un ko praassepen ap leste djal gar buder krik.

³⁴I rom, kai silwerell, leskri choli well baro. Un te well ko diwes, kai nai dell lo leske pale, hoi job leske kras, palle krell lo kowa un rikrell pes gar pale.

³⁵Job lell kek lowe, har bud les ninna kameh te dell, tchi nai deh, hoi les nai pale rikrell.