Read O Debleskro Drom - I Bibla an o Romano Rakepen 2021 Gosewe laba 8 Bible Online

Gosewe laba 8 - O Debleskro Drom - I Bibla an o Romano Rakepen 2021 bible

Gosewe laba 8

¹O goswepen hi har i dai, kai dell tut gole, har i pheen, kai mukell pes te shunell.

²Pral pash o drom, hi li tardo, kote, kai i dromma khetne wenna.

³Pash i foreskre wudja dell li gole, kote kai jek dran o foro win djal, un kote, kai jek an o foro dren djal:

⁴Ap tumende lauterende dau gole, miro rakepen hi hakeneske ap kai phub.

⁵Haiwenn tumer tchi? Palle denn jak ap gosewe laba! Han tumer dinelo? Palle dikenn dren, hoi tumenge mishto hi!

⁶Shunenn, hoi rakrau! Me penau tumenge kutch laba. Un miro mui rakrell, hoi tchatcho hi.

⁷Awa, miro rakepen hi o tchatchepen. Kamau te rakrap kek tchilatchepen. Kowa wals djungeles an mire jaka.

⁸Lauter, hoi rakrau, hi tchatcho. An miro rakepen hi kek chochepen, tchi hoi gar tchatcho hi.

⁹Koon haiwell, hoi mishto un gar mishto hi, kowa haiwell, te hi mire laba tchatcho. Un koon bud djinell, kowa dikell, te hi le o tchatchepen.

¹⁰Mukenn tumen mandar te penell, har te djiwenn! Kowa hi tumenge feteder har te nashenn o rup palla! Rodenn, har te djinenn budeder. Kowa hi tumenge feteder har kutch sonakai.

¹¹O goswepen hi budeder moldo har kutch mirklia[2]. Un tchi, koleske tiro dji nai palla nashell, hi jaake bud moldo har o goswepen.

¹²Me hom o goswepen, un djinau, hoi tchatcho hi. un nai penau wawarenge, hoi lenge mishto hi.

¹³Kowa, kai kamell o baro Debleha te djiwell, kowa kamell o tchilatchepen gar glan peskre jaka te dikell, kowa dikell gar tele ap o wawareste un phurdell pes gar pre, kowa djal gar i tchilatcho drom, un rakrell kek chochepen.

¹⁴Mire labentsa sikrau jekeste o drom, un krau leskre jaka pre. Djinau, hoi mishto un gar mishto hi, un man hi i soor.

¹⁵Mandar well i soor, hoi dau i bare rajenge. Mandar well, te nai rakrenn i tchatchepangre raja o tchatchepen win.

¹⁶Mandar lenn i pralstune pengri soor, te penenn le i menshenge, hoi te krenn le. Mandar lenn i tchatchepangre raja pengri soor, te rakrenn le o tchatchepen win pral i menshende.

¹⁷Me kamau kolen, kai man kamenn. Un kolla, kai rodenn man o djijestar, kolla hatsenn man ninna.

¹⁸Brawlepen un barepen dau me, brawlepen, hoi atchella, un o tchatchepen well mandar.

¹⁹Hoi tumer mandar lenn, hi feteder har o latcheder sonakai, kutcheder har o latcheder rup.

²⁰Kote, kai i menshe ap o tchatcho drom djan, un an o tchatchepen tardo hi, kote hom me ninna,

²¹te dap kolen, kai man o djijestar kamenn, jaake bud, te nai djiwenn le mishto, te krap lengre khera pherdo brawlepen.

²²O baro Dewel kras man glan i rah tsiro. Glan hako wawar koowa kras lo man.

²³Me homs koi glan hako tsiro, har i phub gomme gar kerdo was.

²⁴Har i bare panja gomme gar koi his, wom boldo. Har i tikne panja gomme gar nashan, homs me.

²⁵Har i bare berge gomme gar tardo his, un i tikne berge gar kerdo his, wom me boldo.

²⁶O baro Dewel kras gomme gar i phub un o them, witar gar i tchik koi pre.

²⁷Me homs pashel, har kras lo o bolepen un koi platsa, kai dikell win, har te wans o bolepen un o baro pani kote khetne.

²⁸Har tchiwas lo i wolke ap o bolepen, un kras o pani an o telstunepen soreles,

²⁹har lo i panjenge penas ‘bis kate un gar dureder’, har lo i phub tardo kras,

³⁰kote homs leskro tchawo an leskri gali[3]. Un job his bachtelo pral mande hako diwes. Un me khelom mange glan leste hako tsireske.

³¹Ap i phub, hoi job kras, khelom, un miro dji sanas, har homs mashkral i menshende.

³²Doleske, mire tchawe, shunenn ap mande! Bachtele hi kolla, kai ap miro drom djana!

³³Shunenn, te dau tumen trad! Lenn kowa ap o dji un krenn, hoi penom!

³⁴Bachtelo hi ko mensho, kai shunell ap mande, kai hi tardo pash miro wudar hako diwes, un dell jak ap miro kheer.

³⁵Ko mensho, kai man hatsas, kowa hatsas o djipen, un o baro Dewel dikell latches ap leste.

³⁶Kowa, kai gar pash mande well, krell peskro djipen paash. Hakeno, kai kamell tchi mandar te djinell, hi ap o drom, hoi anell an o merepen.