Read O Debleskro Drom - I Bibla an o Romano Rakepen 2021 Sikepaskro 10 Bible Online

Sikepaskro 10 - O Debleskro Drom - I Bibla an o Romano Rakepen 2021 bible

Sikepaskro 10

¹Mule matsille[4] an o sungepaskro djet krenn o latcho djet fulles. I tikno dinlepen nai krell o tselo goswepen un an-dikepen i menshestar paash.

²O goseweske penell leskro dji, te krell lo, hoi tchatcho hi. O dineleske penell leskro dji, te krell lo, hoi gar tchatcho hi.

³I narweleskro drom sikrell, har dinelo job hi. Lauter penenn lestar: Hawo narwelo hi lo!

⁴Te well o rajeskri choli pral tute, palle ma dja tutar; jek kai haiwell te rikrell lo pes pale, rakrell jaake, te djal i choli krik.

⁵I djungelo koowa dikom ap kai phub, kowa anenn i sorele pale te pale ap pende:

⁶I dineleske denn le peskri beshepaskri kote, kai i pralstune beshenna, un i brawele hunte beshenn pen ap i telstune beshepangre.

⁷Budepangren dikom, kai ap graja beshde hi, un pralstune hunte nashan har budepangre.

⁸Koon i cheb win hadella, nai perell koi dren. Un koon i massuri khetne phagella, koles nai dandrell i sap.

⁹Koon barra khetne phagella, kowa nai dukrell pes koi pashel. Un kowa, kai kasht tiknes krella, nai dukrell pes, te dell lo gar garda.

¹⁰Te hi jekes i tower, hoi tchinell buder gar, hunte budrell job peskri tseli sorjah. Te hi lo gosewo, dikell lo palla, te tchinell o tower mishto.

¹¹I murshes, kai haiwell mishto o sapeha te rakrell, hi tchi kolestar, te well job dandedo, glan te durkras lo o sap.

¹²O rakepen hoi dran o goseweskro mui win wella, anell leske an-dikepen, o dineleskro rakepen chal les pre.

¹³Hako lab, hoi penell lo, hi fun glanstunes bis palstunes dinelo rakepen.

¹⁴Ko dinelo krell bud laba un haiwas gar, kai kek mensho djinella, har halauter wella. Un kek nai penell leske, hoi pal leste wella.

¹⁵I budi krell o dineles khino, un job djinell gar, har te hatsell lo o drom an o foro.

¹⁶Djungeles djal i menshenge an i them, koleskro baro rai i tchawo hi, un kai i pralstune taissarlakro chapangre hi!

¹⁷Bachtelo hi ko them, kai o baro rai i an-diklo mursh hi, un i pralstune an o tchatcho tsiro latches chana, har an-dikle mursha un gar har mate.

¹⁸Te kamell jek gar te budrell, perell leskro kheer khetne, un o brishin well dren.

¹⁹Kones chapen hi, nai sal. Koon mool pijell, nai giwell. I lowentsa nai well tut kowa halauter.

²⁰Ma praasse o baro rajes, witar gar an tiro dji! Un ma praasse i braweles, witar gar an tiro tchiben, kai tu tut pasheh. I tikno tchirklo nai shunals tut, un penals dureder, hoi penal.